الحلقه الاولي ..
ها هو صباح يوم الاحد يشرق في ساعته الاولي ...
الام : نادر حبيبي قوم يلا علشان تلحق جامعتك ... النهارده اول يوم ليك في الجامعه مش معقول هتروح متاخر اول يوم
نادر :( بصوت خافت ) امي سبيني10 دقائق بس وانا هصحي
الام : كفايا نوم بقي يلا قوم
نادر : ( يستيقظ من نومه متبسما ) صباح الفل يا اجمل ام
الام : ايه ده ..!! ايه الشعر اللي علي الصبح ده
نادر : طبعا امي حبيبتي لو مش هقول شعر فيها هقول في مين يعني ...؟؟
الام : (مبتسمه ) ربنا يخليك ليه يا نادر يارب ويوفقك ... يلا بقي جهزت لك الفطار علشان تلحق تفطر .. وكويت هدومك يا حبيبي .. وعملتلك اللبن
نادر : لبن ...!! _ ماما هو انا لسه ما اتفطمتش ..!! ماما انا كبرت علي اللبن انا ما بقتش صغير بحسك بتعامليني كأني طفل .. ليه كده
الام : مهما كبرت هتفضل في عيني صغير يعني هتكبر علي امك ..؟
نادر : لا طبعا يا ست الكل _ بس مش للدرجه دي يا ماما يعني
( يستيقظ ويجلس علي سفرته يتناول بسرعه بعض الاطعمه ...)
_انها الان العاشره صباحا ..
يدخل نادر جامعته لاول مره وهاهو لسان حاله" لقد كبرت الان وتركت المرحله الثانويه وها انا الان في الجامعه لقد مرت ايام الثانويه سريعا "
واذ به وهو يمشي محدثا نفسه سارحا شارد الذهن يصطتدم باحد الشباب ..!!
نادر : (مرتبكا ) انا اسف انا اسف مكنش قصدي !!
فيقول له الاخر لا عليك ... فاذ به ينظر اليه اذا هو هشام صديقه ايام الثانويه
هشام : مش معقول ....!! نادر ..؟؟
نادر : مستحيل .. هشام .. مكنتش متوقع اننا هنتقابل تاني خصوصا انك كانت حابب الادب والفلسفه ... ايه اللي جابك كليه الحقوق بقي ...؟؟
هشام : ابداً يا سيدي النصيب .!
نادر : تعالي بقي نشوف الجدول بتااع المحاضرات بتاعتنا والمدرجات فين !!
هشام : يلا بينا
( يدخل الشابان قاعه المحاضرات .. وجلسوا .. كل منهم يسترجع ذكرياته مع الاخر )
هشام : بس يا سيدي ورحت داخل كليه الحقوق
نادر: ها ها ...؟؟ كنت بتقول ايه بقي .؟
هشام : لااااا .. ده انت مش مركز معايا خالص .. اللي واخد عقلك يا سيدي
نادر : لا خالص ولا شىء انا معاك كمل كمل
هشام : اكمل ايه بس هو انا بحكي حدوته ثم انت سايبني بكلمك وبتبص علي ايه كده ..؟؟
( فينظر هشام علي الشىء الذي اخذ اهتمام نادر ...)
هشام : هي دي اللي وخده عقلك .. ياعم انت النهارده اول يوم في الدراسه .. لسه بنقول يا هادي
ثم انت جاي تحب ولا تدرس .. ثم انت طول عمرك بتصلي وعارف ربنا وعاقل يعني ايه اللي جري
نادر : ياااااااااااه منك يا هشام وعلي كلامك
( فيدخل الدكتور قاعه المحاضرات )
نادر : بس اسكت بقي الدكتور دخل مش عايزين يدينا كارت احمر من اول يوم
هشام : (ضاحكا ) ليه هما عنا معندهمش كروت صفرا الاول ولا ايه ..؟؟
( و هنا يبدأ الدكتور في التحدث فيعم الصمت علي القاعه .. )
-وبعد انتهاء المحاضره
هشام : عاجبني اوي الدكتور اسلوبه كويس اوي وجميل
نادر : ياعم هو كان شرح لسه حاجه علشان تشكر فيه ..؟؟
هشام : ياعم انا عارف انا ما قولتش شارحه.. بقول اسلوبه في الكلام راقي كده انا عارف الاسبوع الاول كله هيبقي تعارف ومفيش في دراسه .. ولا انت شايف غير كده ..؟؟
نادر : ها ها ..؟؟ بتقول ايه ؟؟
هشام : يااااه هي الحاله جاتلك تاني ولا ايه الصراحه يابني انا بدات اخاف عليك والله انا ملاحظ اثناء المحاضره عينك ما نزلتش من عليها ..
نادر: ( مقاطعا كلام هشام ) خلاص عملتني حاله وعملت نفسك دكتور ثم مين اللي بتتكلم عليها دي اصلا ثم انت مركز معايا ليه ومش مركز في المحاضره .. ثم لو عايز صدقتنا تستمر بجد بلاش اسلوبك ده معايا
هشام : ايه ده كله .. في ايه يابني انت اخويا احنا نعرف بعض بقالنا سنين وانا خايف عليك
نادر : انا مش صغير
هشام : علي العموم حقك عليه .. بس هي عجباك اوي كده ..؟؟
نادر : يوووووووووووووه انت بقيت مش معقول يااخي انا سايبلك الجامعه كلها وماشي
هشام : لالالا ... استني بس يا مجنون هـ قولك ..!!
( نادر يمشي ولا يهتم لكلام هشام )
هشام : انا بس كنت هساعدك انك تكلمها .. لو تحب يعني ..
( هنا يقف نادر .. وينظر لـ هشام بغضب )
نادر : مش قولت بلاش هزار
هشام : ياعم ومين قال بس اني بهزر
نادر : بجد يا هشام ...(ثم يتردد ) لالالا يا هشام مالكش دعوه شيل ايدك انت بس من الموضوع مالكش دعوه ..!!
هشام : براحتك انا بس كنت حابب اساعدك
نادر : لو عايز تساعدني بجد .. انسي الموضوع خالص .. وما تزعلش من عصبيتي عليك النهارده انت عارفني عصبي شويتين
هشام : عيب عليك احنا اخوات يلا نتقابل بعد بكره ..؟
نادر : ان شاء الله .. مع السلامه
هشام : مع السلامه
*************************
الحلقه الثانيه ..
( جرس الباب يرن )
- الام : ايوة جاي .. حاضر يلي بتخبط
- نادر: السلام عليكم يا ست الكل
- الام : عليكم السلام ياروح قلبي تعالي احكيلي عملت ايه في الجامعه النهارده
- نادر: ابداً .. هي محاضره واحده بس اللي حضرناها وكانت تعارف وكده
- الام : المهم يا نادر عايزيك تشد حيلك من اولها علشان تجيب مجموع كبير واشوفك ضابط اااااااااد الدنيا
- نادر : ربنا يخليكي يا ست الحبايب ... المهم بقي عامله لنا اكل ايه لحسن انا ميت من الجوع
- الام: من عنيه يا حبيبي ثواني ويكون الاكل جاهز .. عامله لك ملوخيه اللي بتحبها
- نادر : تسلم ايدك يا امي
( يدخل غرفته يغير ملابسه ... ثم يجلس علي السفره ياكل ... ثم يدخل غرفته ويغلق الباب ..)
- الام : نادر .. انا عاملتك الشاي اهوة تعالي خده .. ياناااااااادر ..؟؟
- الام : ( محدثه نفسها ) هو ما بيردش ليه ..؟؟
( تفتح باب غرفته .. تلاقيه نايم علي السرير وينظر للسقف )
- الام : مالك يا نادر بنادي عليك بقالي ساعه .. حد مزعلك في الجامعه ولا ايه ؟
- نادر : لا والله يا ماما ابدا ً .. بس تعبان شوية وعايز انام
( تخرج الام وتغلق باب الغرفه علي نادر )
- نادر : ( محدثا نفسه ) ياتري البنت اللي شفتها في الجامعه النهارده دي اسمها ايه ..؟ وياترى مرتبطه او بتحب ... وياتري هشوفها تاني ... ولو شفتها هعرف اكلمها .. هو انا اصلا كده صح ولا غلط ... وفي كل الاحوال نهايه ده كله ايه ...!!
- في صباح اليوم الجديد .. يوم الاتنين
- الام : نادر اصحي يلا الساعه بقت 10 يلا علشان تفطر معايا
- نادر : لا يا ماما افطري انتي انا تعبان شوية
- الام : تلاقيك تعبان من كتر النوم بس ده انت حتي امبارح نايم بدري اوي
( تقترب الام منه وتمسك بيده يلا يا حبيبي .. فاذ بها ترى يداه ساخنه جدا )
- الام : نادر ايه ده انت جسمك سخن نار ... يلا معايا نروح للدكتور حالا
- نادر : لا ياماما انا شوية وهبقي كويس بس تلاقيه شوية برد
( تخرج الام تتصل بالطبيب )_ وبعد دقائق جرس الباب يضرب من جديد ...
- الام : ده شكله الدكتور يا نادر
- الام :( تفتح الباب ).. اهلا وسهلا يا دكتور تعالي اتفضل من هنا
- الدكتور : صباح الخير يا استاذ نادر مالك بقي خوفت ماما ليه كده عليك ..؟
- نادر : ابدا ً والله يا دكتور انا قولت لماما ده شوية برد وهيروح لحاله
( الدكتور يضع السماعه علي بطن نادر .. ويتمتم بكلام غير مفهوم .. ويقوول تمام تمام )
- الام : خير يا دكتور محمد طمني ...
- الدكتور : ما تخافيش خالص انا هكتبله علي علاج ياخده هيبقي زي الحصان ان شاء الله هو بس تلاقيه كان مخفف في اللبس شوية
( ويغادر الطبيب المنزل )
- وهنا نادر لسان حاله : وبعدين بقي انا من ساعه ما شفت البنت دي وانا حالي اتلخبط ليكون ربنا بعتلي انذار علشان ابعد .. او يكون بيعاقبني علشان بفكر فيها ..!!
ويأتي صباح يوم جديد يوم الثلاثاء ..
الام: انت بتعمل ايه يا نادر
- نادر : بلبس يا ماما النهارده الثلاث ورايا محاضرات .. انتي نسيتي ولا ايه ..؟ ابنك بقي في الجامعه
- الام : لايا حبيبي ما نستش ولا حاجه بس ما ينفعش تروح الجامعه انت لسه تعبان النهارده ..
- نادر : ( يتكلم بعصبيه ) يا ماما بلاش الخوف الزياده ده انا ما بقتش صغير
- الام : ( غاضبه ) يعني ايه ما بقتش صغير ..؟؟ خلاص كبرت يا نادر ودخلت الجامعه وصوتك علي عليه ؟؟؟
- نادر : ماما والله انا اسف مش قصدي ( ويقبل يد والدته ) حقك عليه يا ست الكل انا غلطان
- الام: انت عارف يا نادر انت ابني الوحيد يعني ماليش غير ربنا يا ابني ثم انت
- نادر: انا عارف يا ماما وانا كمان ماليش غيرك .. وعارف انتي اد ايه ست عظيمه بكره اتخرج واشتغل واسعدك واعوضك عن السنين اللي فاتت كلها انا عارف انك من يوم وفاه ابويه .. وانتي الاب والام والاخت ... ربنا يخليكي ليه
( تضمه الام ضمه علي صدرها )
الام : ويخليك ليه يا حبيبي ..
الام: موبايلك يا نادر بيرن
- نادر :( مهرولا ً الي الهاتف ) .. ده هشام صاحبي يا ماما
- نادر: السلام عليكم
- هشام : عليكم السلام .. ايه يا عم من اولها غياب كده لالا كده مش هينفع
- نادر : ياعم طيب اسألني ماروحتش الجامعه ليه ..؟؟
- هشام : اه صحيح .. مجتش ليه بقي ..؟؟
- نادر : ده انا كانت حرارتي مرتفعه جدا وكنت تعبان اوي يا هشام
- هشام : لا اله الا الله .. لا الف سلامه عليك شد حيلك بقي
- نادر : انا بقيت تمام الحمد لله ... بس انت عارف ماما وخوفها عليها بقي منعتني من النزول النهارده
- هشام : ( ضاحكا ) يعني اوامر عليا ما تقدرش تخالفها طبعا
- نادر : شكرا علي سؤالك يا اتش
- هشام : عيب عليك .. احنا اخوات
- نادر : ربنا يخليك يارب وانا ان شاء الله اشوفك بخير علي يوم الخميس
- هشام : ان شاء الله _ صحيح يا نادر اوعي ماتجيش يوم الخميس انت ليك عندي اخبار حلوة اوي هتعجبك ..
- نادر: اخبار ... اخبار ايه ياهشام ..؟؟
- هشام : خلاص بقي لما تيجي يوم الخميس خليها مفاءجاه
- نادر : طيب يا سيدي عارفك.. تلاقيها حاجه تافهه في الاخر
- هشام : طيب مش هقولك بقي اسمها ايه ..؟؟
- نادر : هي مين ..؟
- هشام : انت فاهم كويس .. بلاش تستهبل ..!!
- نادر : انا مش قولتلك ابعد عنها مالكش دعوه بيها ..!!
- هشام : انا عرفت اسمها بالصدفه
- نادر : اسمها ايه بقي ..؟
- هشام : بسهوله كده ابدا ً مش هقولك
- نادر : (بعصبيه) ياااااه منك يا هشام
- هشام : خلاص خلاص هقولك .. اسمها ياسيدي ..." راندا "
- نادر : انت شافتها ..؟
- هشام : يعني جبت اسمها من الحلم _ انا سمعتها بتتكلم في الموبايل بتقول انا راندا
فقلت ااقولك يمكن يهمك انك تعرف اسمها ولا حاجه .. وانا عارف انه اكيد يهمك
- نادر : خلاص ياعم متشكرين جدا
- هشام: علي ايه يانادر علشان تعرف بس دايما كده جممايلي مغرقاك ... يلا سلام
- نادر : سلام يا اتش .. وشكرا تاني
*****************************
الحلقه الثالثه ..
الام : نادر انا عملتلك شاي اهوة تعالي نشربه سوا في البلكونه
نادر : يااااااااه تسلم ايدك يا ماما كنت محتاج اوي لكوبايه الشاي دي
( نادر يقف بجوار والدته في البلكونه )
- الام : انت نازل الجامعه امتي يا نادر ..؟
- نادر : الخميس بقي ان شاء الله يا ماما
- الام : عايزاك تاخد بالك من نفسك يا نادر وتركز في الدراسه وبس ... وبلاش تعمل زي الشباب اللي مش بتروح الجامعه علشان تتعرف علي بنات وتخرج معاهم والحاجات دي علشان ربنا لما يكرمك وتتجوز ربنا يرزقك ببنت الحلال ولما ربنا يكرمك وتخلف اذا جبت بنت ربنا يرعاها لك .
(نادر فاقد النطق .. وكأنه لا يبالي بكلام والدته .. او كأنها لا تتحدث معه وتتحدث مع نفسها )
- نادر : ( يحدث نفسه ) .. ليه ماما قالتلي كده دلوقتي هو انا باين عليه اوي كده .. ولا هي قلبها حاسس .. ولا انا اللي حاطط في دماغي بس ..!!
- الام : نادر انا مش بكلمك ..!!
- نادر : انا معاكي يا ست الكل .. بس مستغرب يعني انتي مش عارفه ابنك ..!! بنات ايه بس .. انتي وبس اللي حبيبتي يا احلي ام في الدنيا.
- وبدات تشرق شمس يوم جديد انه يوم الخميس ..
- الام: نادر يلا علشان الجامعه .. نادر ( تدخل غرفه نادر تلاقيه لابس هدومه ومتشيك علي الاخر )
- نادر : انا صحيت يا ماما ولبست كمان اهوه
الام : ايه النشاط ده كله علي غير العاده يعني تتحسد
- نادر :لا ابدا بس حسيت نفسي فايق اوي النهارده بس عادي يعني انا ممكن انام تاني وانتي تصحيني ( ضاحكا )
- الام : نام بقي وانا مش هصحيك علشان ما تروحش الجامعه .. ااقل ما فيها تقعد تسليني شوية
- نادر : يا ماما انتي ممكن تسلي نفسك بشوية لب او سوداني عادي يعني
- الام: ( ضاحكه ) افضل ارغي بقي لحد لما تتاخر بجد
- نادر : لالالالا خلاص .. يلا سلام
- الام: سلام ايه استني افطر الاول
- نادر : انا هاخد سندوتش كده وانا ماشي يلا سلام
- الام : سلام يا حبيبي خلي بالك من نفسك..
هاهو علي ابواب الجامعه يننظر في ساعته اذا هي العاشره ..
- نادر : ( يطلع موبيله متصلا ) .. ايه يا هشام انا عند باب الجامعه انت اتاخرت كل ده ليه بقي .
- هشام: ياعم براحه بس عليه شوية انا لا اتاخرت ولا حاجه انا جيت من نص ساعه وجوه عند المكتبه كده
- نادر : طيب تمام خليك مكانك انا دقيقه هكون في وشك
- هشام : اوكي ... مستنيك .. سلام
( يطلع منديل من جيبه نادر ... ويمسح الجزمه .. ويطلع نظارته ويلبسها )
.. ويدخل الجامعه ..
- هشام: انت ياعم يلي واخد في وشك وماشي رايح فين بقولك عند المكتبه
- نادر : آه آه معلش .. اعذرني بقي لسه جديد ما حفظتش مكان المكتبه
- هشام: ياسيدي بكره نحفظ .. بس صحيح قولي ...؟؟
- نادر : ااقولك ايه ..؟
- هشام : ايه العطور الجميله دي ولا الشياكه ولا تسريحه شعرك لالالالا .. معقول المرض بيخلي الواحد يحلو كده .. طيب يارب امرض علشان ابقي حلو زيك كده
- نادر : (ضاحكا ً ) مش هتحلو برضوا هتفضل وحش زي ما انت ويمكن توحش اكتر
( وهنا يتبادل الصديقان الضحك .. ولكن نادر هنا عيناه شاردتان تبحث عن شىء ما )
- هشام: بتدور علي حد ولا ايه ؟؟ قول قول ما تتكسفش يا راجل ..؟؟
- نادر : تاااااااني هنرجع للكلام ده يا هشام
- هشام : خلاص خلاص كنت هقولك خبر جديد بس خلاص
- نادر : ايه بقي قول ..!!
- هشام : بعينك ااقولك علي حاجه.. ثم عايز تعرف ليه .. لو انت معجب بيها كنت قولتلك اخبارها بس انت محترم بقي مش بتعجب ببنات صح
- نادر : اه صح مش عايز اعرف حاجه _ يلا بقي علشان نلحق المحاضره
( وفي اثناء المحاضره يتلفت نادر يمينا ويسارا بحثا عنها ..!!)
- هشام: (هامسا بصوت هادىء) ريح نفسك مش هتيجي النهارده .
- نادر : انت بتتكلم جد ..
- هشام: مالكش دعوه ..
- نادر : علشان خاطري .. بص الصراحه انا مش عارف بس بجد انا شفتها مره وحده بس ليل نهار بفكر فيها ومش عارف ايه اللي حصلي
- هشام: ياعيني يا عيني _ انا قولت كده فـ الاول . شكلك طبيت ولا ايه ..؟
- نادر : وحياه ابوك يا اخي ما تغلبني في ايه بقي
- هشام : مفيش بس كنت بوقعك في الكلام
- نادر : ياااااااه عليك ارتحت دلوقتي
- هشام: اه ارتحت اوي _ وانت كمان ارتاح بقي
- نادر : ارتاح .. ارتاح ايه ..؟؟
- هشام : صحبتك جت هناك اهيه
- نادر : ( متلهفا ً ) بجد انت بتهزر صح فين .. ها فين ..!
- هشام: براحه براحه مش كده امال هناك اهيه .. قاعده لوحدها خالص !!
- نادر: اه فعلا ً وبعدين اعمل ايه عايز الفت انتباها
- هشام: تدفع كام لو خليتك تكلمها ..؟
- نادر : بتهزر ....!!
- هشام : تدفع كااااااام ..؟
- نادر : اللي انته عايزه _ بس ازاي ..؟؟
- هشام : اعمل اللي هقولك عليه ..
- نادر : وايه هو يا فالح شكلك هتضيعني .؟
- هشام : خليك جرىء وروح قولها .. لو سمحتي كنت عايز المحاضره اللي فاتت لو معاكي
- نادر : بدل ما تحرجني ياعم ..!
- هشام : ياعم يلا بقي
( مشي نادر باتجاها _ وفي منتصف الطريق رجع .. وهشام يراقب من بعيد )
- هشام: في اييييييه رجت تاني ليه ؟؟ _ انا عارفك عيل خايب
- نادر : مش قادر ياعم
- هشام : خليك لما حد يجي ياخدها منك
- نادر : يا سلام بسهولة كده ..
- هشام : طبعا يا ابني مش تلمحلها باعجابك ليها _ بدل ما حد يسبقك ويلمح ويخطف البنت منك خليك بقي
- نادر : خلاص انا رايح ( ويمشي مسرعا نادر باتجاها )
- نادر : لو سمحتي يا انسه ..!!
- راندا : ( مستغربه ).. انا ..؟؟
- نادر : اه .. كنت عايز اسألك بس علي المحاضره اللي فاتت بتاعه يوم الثلاث لاني ما جتش ..!
- راندا : وهو محدش قالك اننا مخدناش اي محاضرات الاسبوع ده كل .. ! اي دكتور بيخش بيتعرف بس ..!!
- نادر : ( محاولا تطويل الكلام معها اطول فتره ممكنه ) طيب ممكن اخد جدول المحاضرات
- راندا : هتلاقيه متعلق بره
- نادر : طيب كنت .... ( تقاطعه هنا راندا )
- راندا: بعد اذنك ( وتاخد بعضها وتمشي من ادامه )
( يرجع نادر ووجه محمرا خجلا الي صديقه.. هشام )
- هشام: معقول اتكلمت معاها كل ده
- نادر : بس بس اسكت خالص _ دي احرجتني وشكلها مش بتكلم حد .. شكلها جد اوي _ حتي مالهاش اصحاب خالص ولا بتكلم حد ..!!
- هشام : ياعم كله بيجي بس واحده واحده _ المره دي كلمتين بكره تلاثه
- نادر : لا لا ما افتكرش دي احرجتني ياعم مش هقدر اكلمها تاني ..!!
- هشام يلا بينا طيب الساعه 4.00 نكمل كلامنا في الطريق يلا ...
********************************************
الحلقه الرابعه ..
(يخرج الصديقين من باب الجامعه ....)
- هشام : ( مندهشا ً) بص يا نادر .. !
- نادر: في ايه ...؟؟ أبص علي ايه ..!!
- هشام: بص العربيه دي ..!!
- نادر: ايوة مالها يعني شكلها غاليه اوي ربنا يكرم صاحبها ياعم ..
- هشام : يا اخي انا مش بقصد العربيه ااقصد ااقول شوف مين اللي راكبها .. بص كويس
- نادر: مش معقووول ...!! راندا ..؟؟
- هشام : يخرب عقلبك يعني يوم ما تحب بنت ما تحبش غير دي ..؟؟ لالا ابعد عنها يا حلو بقي لحسن دي شكلها بنت ناس جامده .. لابوها يطلع وزير ولا حاجه وانت تروح بلاش .. وساعتها انا هقول ما اعرفكش طبعا ً
- نادر: لا من الناحيه دي انا متأكد طول عمرك جدع ..
- هشام: ربنا يعوض عليك بقي يانادر وتحب واحده غيرها..
- نادر: ياعم لا هي ولا غيرها خلالالالاص توبه انا منحوس وهفضل منحوس طول عمري
- هشام: بقولك ايه سلام انا بقي الاتوبيس جه ياعم يلا سلاااام ..
- نادر: سلااااام
( وها هو يمشي نادر يائس من حياته .. ولسان حاله البنت اللي عاجبتني طلعت بنت ناس .. ياتري ده ذنبي اني فقير .. ولا سوء حظ .. يلا نرجع ونقول كله نصيب )
- الام: نادر مالك من ساعه مارجعت من الجامعه شكلك مش عاجبني كده مالك يا واد في ايه شغلك كده ...؟؟
- نادر: لا يا ماما .. ابدا ً
- الام: ناااادر ..
- نادر: بصي يا ستي انا عارف نفسي .. مش بعرف اخبي عليكي حاجه .. كل الحكايه هشام صاحبي عارفاه طبعا ً ..
- الام : أكيد طبعا ً ، ماله بقي هشام ..؟
- نادر: صعبان عليه حاله .. شاغل نفسه ببنت وانا نصحته يبعد عن السكه دي بس ما سمعش كلامي ..
- الام: ده اللي شاغلك اوي .. ما يمكن يكون بيحبها وناوي يرتبط بيه ..
- نادر: ياسلام يعني لو انا حبيت ونويت ارتبط يبقي عادي
- الام : اه .. وليه لا
- نادر: امال ايه حديث الصبح اللي ادتهولي ده من كام يوم واوعي البنات ومش البنات
- الام : قولت اياك تلعب بمشاعر بنت او تكدب .. لكن ماقولتش ما تحبش لان ده مش هقدر امنعك منه لانه غصب عنك .. اهم حاجه الصدق
- نادر: بس يا ماما البنت اللي هشام بيحبها مش عاديه ..
- الام: يعني ايه ... بتطير يعني ..؟
- نادر:( ضاحكا ضحك هستيري ) لالالالا يا ماما مش كده
- الام : (ضاحكه ) امال ايه بقي ...؟؟
- نادر: شكلها مبسوطه اوي يا ماما .. غنيه يعني ..!!
- الام: اه .. لا قول لصاحبك يبعد احسن .. ثم وهي بتحبه ..؟
- نادر: لالا طبعا ده _ هي ما تعرفهوش اصلا
- الام : لااااا ده لعب عيال بقي
- نادر: عندك حق (وكأن الكلام .. ماعجبهوش ) .. يلا هنام انا بقي لحسن رايح بكره الجامعه بدري
- الام : ماشي تصبح علي خير
( وبعد مرور عده اسابيع ...)
- هشام : يلا بقي شد حيلك ياعم نادر الامتحانات قربت
- نادر: اه والله .. انا قلقان اوي اول مره امتحن في الجامعه هنا ومش عارف هعمل ايه بس الحمد لله بذاكر والله _ ده غير اني بشتغل مع الدراسه بردو علشان الجامعه محتاجه شوية مصاريف بردو ولبس زي ما انت عارف بقي ..
- هشام : اه اه ربنا يقويك بس سيب الشغل اليومين دول وركز في الدراسه احسن
- نادر: ان شاء الله
( وبعد مرور عده ايام ..)
- الام : كفايا مذاكره بقي يانادر ونام بدري
- نادر: انا قلقان اوي يا ماما الامتحان بكره .. ولازم اذاكر كويس
- الام : ربنا معاك يا حبيبي نام بقي تصبح علي خير
- نادر: حاضر يا ماما .. وحضرتك من اهله
(وتشرق شمس يوم الامتحان .. ويقف في توتر نادر امام الجامعه )
- هشام : صباح الفل يانادر تعالي يلا نشوف ارقام جلوسنا
- نادر: يلا بينا
( مضى الصديقين كل منهم يبحث علي رقم جلوسه )
- نادر: تمام .. انا لقيت بتاعي انا لجنه رقم 6 ياعم يلا شوف بتاعك بقي
- هشام : اشطه وانا لجنه 9 .. يلا بقي .. اشوفك بعد الامتحان ادام بابا الجامعه
- نادر: تمام يلا سلام
( هنا يدخل نادر الامتحان .. والتوتر يزداد عليه )
- مراقب اللجنه : شوف اسمك مكتوب فين وااقعد في المكان اللي موجود فيه اسمك
(نادر يبحث علي اسمه في المدرجات ...وها هو يعثر عليه .. ويجلس في صمت يقرا الفاتحه في سره )
- مراقب اللجنه : اتفضل ورق الاجابه ده خد واحده ليك ووصل الثانيه لزميلتك اللي جنبك ..
- نادر: اتفضلي يا انسه ( واذ به يتصدم .. انها راندا )
- راندا : ( تنظر له باستغراب .. محدثه نفسها انه هو ذلك الشاب الذي لا ترفع عينه عني طوال الترم ...) وتقوله متشكرا جدا
- نادر: (محدثا نفسه) .. ياربي ما صدقت نسيتها تبقي جنبي كده وهشوفها كل يوم ..ياتري ده من حسن حظي ولا من سوء حظي ..!!
(وينتهي الامتحان .. ويخرج نادرا ً متلهفا ً يبحث عن هشام )
- نادر : هشام .. هشام .. ايه عملت ايه النهارده يارب تكون حليت كويس
- هشام : اه الامتحان سهل جدا ً مكنتش متوقع انه هيكون بالسهوله دي
- نادر : اه فعلا .. عقبال اللي جاي _ هقولك علي حاجه مش هتصدقها حصلت النهارده يا اتش ..
- هشام : حاجه ايه قول ..؟؟
- نادر : عارف راندا
- هشام : مش دي البنت اللي انت كنت متيم بيه دي اوي ..؟
- نادر: اه هي _ هتصدق لو قولتلك انها كانت جنبي النهارده بيني وبنيها ااقل من متر تتخيل ده
- هشام : بص انت صحبي .. ولو عايز رأي بجد شيل الموضوع ده من راسك خالص .. لانه مش هينفع .. معلش يا نادر ما تزعلش من كلامي .. هتبصلك علي ايه ..!! دي عايزة واحد يكون عنده عربيه وفيلا _ ما تزعلش من كلامي يا صحبي بس لازم افوقك
- نادر: لالا خالص عندك حق طبعا ً... يلا انا همشي بقي اروح اطمن ماما تلاقيها علي اعصابها يا عيني _ يلا سلام
- هشام : سلام
( جرس الباب يرن ...)
- الام : حاضر يانادر ( تفتح الباب مسرعه ) .. قولي عملت ايه بسرعه هاااا قول يلا
- نادر: براحه بس ياماما اخد نفسي _ علي العموم ان شاء الله هجيب امتياز ما تخافيش
- الام: طيب الحمد لله يلا بقي ماده وانتهت فكر بقي في اللي جااااي وشوف وراك ايه يا نادر
- نادر: حاضر يا ست الكل .. هرتاح شوية من الطريق بس وهقوم اذاكر علي طول
( يدخل نادر غرفته _ يغلق باب غرفته عليه .. وصوره راندا امام عينيه )
- نادر: ( محدثا ً نفسه ) .. ياه لو كنت غني اكيد مكنتش سيبتك يا راندا .. وكنا نعيش انا وانتي في فيلا .. ويكون عندنا عربيه و... ( تقاطعه امه )
- الام : نااادر ... يا ناادر _ ده كله بتغير لبسك يلا الاكل جهز يا حبيبي تعالي يلا الاكل هيبرد ..
- نادر: حاضر حاضر يا ماما انا جااااي اهوة
*************************************
الحلقه الخامسه ..
( نادر يجلس ماسكا كتابه ... يحاول المذاكره _ ولكن شىء ما يشغله .. ثم يسارع ليمسك هاتفه _ ثم يغلق باب غرفته بشويش )
- نادر: الو .. السلام عليكم يا اتش اخبارك ايه ..؟
- هشام : عليكم السلام .. مش معقول نادر بيتصل بيه بنفسه.. تتحسد ياخي ..!!
- نادر: هو انت علي طول هزار كده _ تصدق انا غلطان اني كلمتك اصلا يلا سلام
- هشام : خلاص .. خلاص ياعم مش هـ هزر معاك تاني
- نادر: انا كنت عايز اتكلم معاك شوية يا هشام .. لاني مخنوق شوية ومحدش غيرك بحب اتكلم معاه
- هشام : عيب عليك احنا اخوات يا نادر ... في ايه ..؟؟
- نادر : مش عارف اركز في المذاكره .. ولا عارف ابص في الكتب .. علي طول شايف صوره راندا ادامي ....
- هشام: ( مقاطعا ً كلام نادر ) يوووووووووة رجعنا تاني للحكايه دي مش كنا خلاص نسيناها ..
- نادر: مش قادر انا الايام اللي فاتت كنت بضحك علي نفسي بس الصراحه ما نستهاش خالص _ بس لما شفتها النهارده مش عارف اللي حصلي
- هشام: بص يا صاحبي الكلام هيطول وكده هخلص لك رصيدك _ بعد بكره ان شاء ا لله لينا قاعده مع بعض بعد الامتحان
- نادر: طول عمرك ابن خلال _ وفرت عليه رصيد
- هشام :(ضاحكا ) عارفك بخيل ... يلا سلام يا جلده
- نادر:(ضاحكا هو الاخر ) .. سلام يا اتش
( وياتي اليوم الثاني للامتحان )
- الام : ايه يا ابني انت رايح امتحان ولا رايح تتجوز ..؟؟ _ واقف ادا المرايا تسرح شعرك بقالك ساعه ..!!
- نادر : يعني اللي يروح يمتحن لازم يروح ويلبس لبس وحش ويبسيب شعره من غير تسريح .؟؟
- الام : لا يا فالح .. بس يسرح شعره حاجه ويقف يجي نص ساعه قدام المرايا دي حاجه تانيه
- نادر: خلاص .. انا خلصت يا ست الكل ونازل اهوه .. ادعيلي انت بس الامتحان يجي سهل
- الام : اخس عليك يا نادر .. هو انا مستنياك تطلب مني ادعيلك _ ده انا ليل نهار بدعيلك يا نادر
- نادر: ربنا يخليكي ليه يارب .. يلا سلام بقي
(نادر يذهب للجامعه .. ويسارع بالدخول الي المدرج .. ثم يرن موبايله )
- نادر: الو .. ازيك يا اتش
- هشام : انت فين ياعم حد يجي متاخر كده يوم الامتحان انت بتهزر ..؟؟
- نادر: لالا انا جيت ودخلت انا في المدرج ..
- هشام : بقيكده وسايبني مستنيك بقالي ساعه .. المفروض انا كنت افهم كده
- نادر : معلش والله كنت هكلمك وهقولك حالا _ المهم ما تنساش بقي بعد الا متحان
- هشام : ماشي بص هستناك .......( يقاطعه نادر )
- نادر: سلام .. سلام دلوقت
- راندا : صباح الخير
- نادر : ( مستغربا ً ) .. انا
- راندا : هو في غيرك ..؟؟
- نادر: ( مرتبكا ً ) لا بس بحسبك بتكلمي حد تاني _ صباح النور
- راندا : انت مالك مش علي بعض ليه كده
- نادر: لا بس مكنتش متوقع اني اكلمك ..
- راندا : ليه يعني ..؟؟
- نادر: يعني بعد ما كلمتك من اول الترم الاو واسلوبك معايا مكنش اد كده ، بصراحه حسيتك احرجتيني
- راندا : (مبتسمه ابتسامه خجل) ياااااه انت لسه فاكر ده انت قلبك اسود اوي
- نادر: لا والله خالص
- راندا : بص يا نادر انا مكنتش اعرفك ومش ينفع اتكلم مع اي حد كده وخلاص
- نادر: ودلوقتي ..!!
- راندا : الصراحه انا حسيتك دايما قاعد انت وصحبك اللي بيلبس كاب ده في حالكم وكتير شباب محترم
نادر : معـــــــــ ( وهنا يقاطع نادر مراقب اللجنه )
مراقب اللجنه : الصوت لو سمحتم يا شباب كل واحد يقعد في مكانه يلا
( ويخيم الصمت في المكان .. وينشغل كل منهم في ورقه الاسئله )
- نادر: الحمد لله اخير خلصت ..
- (يسلم ورقه الاجابه للمراقبين ويخرج من اللجنه _ وينتظر امام المدرج )
- نادر: بس بس ..
- راندا : ايه ده انت لسه هنا بحسبك روحت ..
- نادر: لالا انا كنت مروح بس قولت اسالك الاول عملتي ايه في الامتحان قبل ما امشي
- راندا : والله حليت بس السؤال الاخير سبته مكنش في وقت احله والصراحه مكنتش هعرف احله
- نادر: هو الامتحان ده طويل اوي فعى _ غير امتحان الماده اللي فاتت خالص كان سهل اوي بتاع ال ... ( هنا موبايل راندا يرن ... فيسكت نادر )
- راندا : سوري يا نادر ..لحظه _ الو .. طيب تمام انا كمان خرجت من الامتحان دقيقه واحده وهكون عند باب الجامعه
- راندا : فرصه سعيده يا نادر
- نادر: انتي عرفتي اسمي منين ..؟؟
- راندا : مكتوب علي المدرج بتاعك اسمك ورقم جلوسك _ علي فكره انا اسمي راندا
- نادر : انا عارف ( ضاحكا )
- راندا : (ضاحكه ) علي العموم فرصه سعيده يا نادر يلا سلام
- نادر: سلام ( ويظل محدقا ً بعينيه عليها حتي تختفي من امامه وتركب السياره التي تركبها كل مره ...)
- هشام : ( بصوت عالي ) سرحان في ايه ..؟؟
- نادر : ياخي حرام عليك رعبتني هو انت ايه عفريت ..؟؟
- هشام : انت بس اللي عقلك مش فيك .. يلا تعالي نروح نقعد في اي مكان نفطر ونرغي شوية
- نادر : تفطر .. لا ياعم انا خلتك ام نادر عمرها ما تنزلني من البيت من غير فطار
- هشام : نعمل ايه بقي في خالتك ام هشام يا سيدي بتصحي متأخر
( وتتعالي ضحكاتهم في الشارع حتي ينظر لهم من حولهم من صوتهم العالي )
- هشام : يلا ياعم نروح مطعم الكناري
- نادر : مطعم ايه يا عم وبتاع ايه ... ( يقاطعه هشام )
- هشام : ماتخافش ياعم ده رخيص جدا مش هيزيد عن 5 جنيه بس ثم انا عازمك النهارده
- نادر : لا مادام مش هيزيد عن 5 جنيه يبقي لا تعزمني ولا اعزمك كل واحد يدفع لنفسه وابقي اعزمني في حاجه غاليه شوية بس ...
- هشام : ( ضاحكا ) والله وقرت ال 5 جنيه انت صاحب جدع
- نادر : ( ضاحكا ) وانت صاحب بخيل ما صدقت مش تقول لا هعزمك برضوا
( يدخل الصديقين المطعم .. ويطلب كل منهم سنودتشات طعميه .. وبطاطس .. فول _ نظرا لانهم ارخص السنتوتشات سعرا )
- هشام : ايه بقي يا سيدي احكيلي .. ايه اللي كان مضايقك ..؟
- نادر : حرام هتضايقني ليه بس .. انا هحكيلك علي اللي مفرحني ..
- هشام : احكي يا عم روميو ..
- نادر : انا خلاص اتصاحبت عليها ومش بعيد يبقي معايا رقمها في ااقرب وقت دي عرفت اسمي ياعم وطول النهار قبل الماده نازله رغي معايا _ طيب حتي والله العظيم هي اللي بدات الكلام معايا النهارده
- هشام : بص يا نادر انت صاحبي واخويا وحبيبي ..بس كل اللي حكيته ده مش معناه اعجاب او حب .. انت في جامعه وممكن تكون معتبراك صديق عادي ..
- نادر : (مقاطعا كلام هشام ) بس هي قالتلي انا حسيتك محترم اوي وقالت ان .. ( يقاطعه هشام )
- هشام : يا حبيبي ده كل مش معناه حب بردو.. مش عايزك توهم نفسك يا صاحبي علشان ما تصحاش من حلمك ده علي وهم كبير وتنجرح ..
- نادر :(ضاحكا ) الله عليك ياعم اسامه منير انت ...
- هشام : اتريق براحتك .. بس بكره هتعرف معني كلامي
- نادر : الحساب لو سمحت كام ...؟
- كاشير المطعم : 8 جنيه يا استاذ
( يدفعها نادر ويمشي الصديقان )
- هشام : امسك ياعم ال 4 جنيه بتوعي اهوة
- نادر : ياعم اناا كنت بحسب هناكل ب 10 جنيه فاستكترتها لكن 8 جنيه عادي بقي
- هشام :( ضاحكا ) .. يا سلام فرقت اوي _ علي العموم متشكرين ياعم نادر بس ده مش هيخليني اغير رأي بردو في الحوار اللي كنا بنحكي فيه ..
- نادر : ياعم بتشكرني علي ايه بس ..؟؟ هو انت مش ناوي ترد العزومه ولا ايه ...؟
- هشام : ( ضاحكا ) انا قولت خد ال 4 جنيه وريحني انت اللي قولت لا
- نادر : (ضاحكا ) ... يلا بقي الوقت اتاخر سلام بقي
- هشام : ماشي وميرسي علي العزومه
- نادر : ( ضاحكا ) .. ميرسي ..؟؟ _ ده ايه التقدم ده كله
- هشام : (ضاحكا ) مش دخلنا جامعه لازم نتقدم _ لحسن يقولوا علينا فلاحين
- نادر : ( وقد احمر وجه من كثرت الضحك ) امشي .. امشي انت عيل فقري ..سلام
- هشام : سلام
( جرس باب يدق كعادته ... )
- الام : طيب .. طيب يا حبيبي
- نادر : امي حبيبتي .. امي حياتي وحشتيني جدا يا ست الكل
- الام : انت مالك كده .. شكلك حليت حلو اوي المره دي
- نادر : اه الحمد لله
- الام : طيب غير يلا هدومك علي ما اجهزلك الاكل ..
- نادر : لا شاكرا يا ماما انا اكلت مع هشام بره بس ياريت لو كوبايه شاي من ايدك اللي زي العسل دي .. يا عسل انتي
- الام : والله انت ماطبيعي النهارده _ جرالك ايه يا واد ...؟
- نادر : مبسوط يا ماما شوية بس .. بلاااااش ؟؟
- الام : بلاش ليه يا حبيبي ربنا يبسطك دايما يارب
( يغير ملابسه .. وبجلس في البلكونه ..والام تدخل عليه بكوبايه الشاي )
- الام : نادر .. انت اتجننت يا حبيبي خالص صح ..؟؟.. قاعد بتضحك نفسك وانت قاعد ..؟؟
- نادر : لا ابدا بس افتكرت نكته
- الام : طيب ضحكني معاك يلا..
( يحاول نادر ان يتذكر اي نكته ليخرج من هذا الموقف )
- نادر : هشام قاللي النكته دي النهارده ...
أتنين محششين حبوا يستغنوا عن الموبايلات و يستخدموا الحمام الزاجل فالأول بعت الحمامه للتاني المهم التاني فضل يقلب فيها يمين شمال مش لاقي أي حاجه فأتصل بالأول قاله انت هتستهبل باعتلي الحمامه فاضيه الأول : يا غبي دي كلمني شكرا :))
(هنا يعلوا ضحكات الام الي اقصي درجه )
- الام : ده اللي بتخدوه في الجامعه بقي يا خويا انت وصحبك
- نادر : ( محدثا ً نفسا ).. الحمد لله النكته عجبتها ..
************************************************
الحلقه السادسه ...
ليست هناك تعليقات:
إرسال تعليق