الحلقه السادسه ...
- الام : ماقولتليش بقي يا نادر ايه اخبار صاحبك الحبيب ده ..؟؟
- نادر : حبيب .. !! .. حبيب مين _ آه قصدك علي هشام .. الصراحه مش عارف مش بيتكلم معايا في الموضوع خالص .. شكله عقل
- الام : ( تلمح لنادر ) .. الحمد لله يا حبيبي انه مش انت اللي بتحب .. لحسن انت عليك اعراض الحب من دلوقتي امال لو حبيت هتعمل ايه بقي ..؟
- نادر : اعراض .. اعراض ايه بقي ..؟؟
- الام : السرحان .. وتبتسم من غير سبب .. قله التركيز
- نادر : ( متعصبا ) بس انا ما بحبش حد ...
- الام : هو انت اتعصبت ليه _ هو انا قلت بتحب ...؟؟ _ علي العموم يا نادر قول لصاحبك كلمتين .. مش عيب انه يحب .. بس العيب انه يفشل في دراسته .. ولو الحب هيسبب له فشل في دراسته يبقي بلااها حب دلوقتي ويركز في دراسته احسن .. لانه لو فشل في دراسته .. اللي بتحبه نفسها لا هي ولا اهلها هيوفقوا بيه كعريس لبنتهم هيقولوا عليه فاشل _ اما اذا متفوق في دراسته .. وناجح في حياته ... وقتها اي بنت تتمناه لنفسها .. واي ام تتمناه لبنتها .. صحيح انا معايا دبلوم تجاره .. يعني لا دخلت جامعه ولا حاجه .. بس يا ابني الحياه علمتني كتير ..
( الصمت يعم علي نادر _ ويحمر وجه خجلا ً .. وقد علم ان الكلام موجه له هو وان امه قد اكتشفت .. انه يحب فتاه ...)
- نادر : هو التليفزيون فيه ايه النهارده ..؟؟
- الام : انت بتغير الموضوع ليه ..؟؟ كلامي ما عجبكش ولا ايه ..؟؟
- نادر : ابدا .. بالعكس عاجبني جدا .. ويخليني فخور ان امي اللي معاها دبلوم تجاره .. احسن من امهات كتير معاها جامعات ..
- الام : وانا يا نادر عايزه اشوف احسن واحد في الدنيا دي كلها ...
... ( وتمر ايام الامتحانات سريعا وكل يوم يقترب فيه نادر من راندا .. حتي جاء اخر يوم في امتحانات الترم الاول ...)
- نادر : ماما انا نازل بقي علي الامتحان انهارده اخر يوم ادعيلي بقي ..
- الام : طيب خد ال 20 جنيه دي انهارده اخر يوم خليها معاك لو حبيت تجيب حاجه _ انا عارفه والله يا نادر انها قليله اوي وما تكفيش عيل في اعدادي .. بس انت عارف بقي اللي فيها ...
- نادر : عارف والله يا ست الكل .. ومالها ال20 جنيه زي الفل .. غيرنا مش لاقيها هاتي
- ( نادر يمشي في طريقه الي الامتحان )
- نادر : (محدثا نفسه ) .. غيرنا مش لاقي ال20 جنيه .. وغيرنا معاها الملايين .. يعني ما كنتش ابقي غني .. وعندي عربيه بسواق زي راندا كده ... ده انا حتي والله شكلي حلو والعربيه هتليق عليه ( ويضحك بسخريه ) ..
- هشام : نادر .. نادر _ تتحسد انك مستنيني النهارده يعني ..؟؟
- نادر : يعني بحاول ارضيك .. علشان ما تزعلش بس والصراحه بصيت في اللجنه لسه راندا ما جتش ولسه يجي نص ساعه علي الامتحان .. المهم يا هشام كنت عايز اسالك علي حاجه مهمه اوووووي ...
- هشام : اسأل خير ...؟
- نادر : هو انا ليه ربنا ما خلقنيش غني ...؟؟
- هشام : ( يصمت للحظات ) .. بص يا سيدي انا هحكيلك قصه وانت تعرف ليه ربنا خلقك كده " كان في من كان قبلنا ملك ... وكان له وزير .. وكان هذا الوزير دائما اذا اصابه مكروه يقول .. لعله خير .. حتي جاء في يوم وقد قطع اصبع الملك .. فقال له الوزير لعله خير .. فغضب الملك غضب شديد للغايه وقال لهم اسجنوا هذا الوزير الاحمق لقد قطع اصبعي ويقول لعله خير .. وسجن الوزير .. وهم ياخذوا الوزير الي السجن اخذ يردد ايضا لعله خير .. وفي احدي الايام بينما كان يمشي الملك وحده بدون حراس .. هجم عليه مجموع من الهنود .. وقالوا سوف نذبحه ونقدمه قربانا للإله .. فمسكوا الملك وجاء ليذبحوه فوجد ان به اصبع مقطوع فتركوه ... ففرح الملك وذهب الي وزيره .. واخرجه من السجن .. وقال لوزيره لولا قطع اصبعي لكنت ميت الان .. فقال له الوزير .. وانا ايضا ان لم اسجن لكانوا اخذوني وذبحوني الان بدلا منك ...
- هشام : فهمت بقي ياعم نادر ليه ربنا ما خلقناش اغنياء اوي .. يمكن لو كنت غني .. كنت تبقي انسان فاسد .. او ربنا ياخد من صحتك .. قوول الحمد لله يا نادر واشكر ربنا علي اللي انت فيه ...
- نادر : اقسم بالله ان كلامك ده ريحني جدا فووق ما تتخيل _ دلوقتي بس عرفت اهميه الاصدقاء
- هشام : وانا كمان عرفت اهميه الاصدقاء يوم ما انت دفعتلي الحساب في المطعم ..
( وتتعالي ضحكات كل منهم ويذهبوا في طريقهم الي اللجان )
هشام : ايه اخبارك انت ورندا ..؟؟
نادر : لالالا تمام جدا جدا .. النهارده اخر يوم ولازم اخد رقم موبايلها طبعا .. لاني مش معقول ااقعد فتره اجازه نص السنه من غير ما اشوفها ولا اسمع صوتها بس تفتكر هترضي تدهولي ..؟
- هشام : الله اعلم .. جرب ..!! _ يلا خش لجنتك انا ماشي علي لجنتي سلام ..
( يمسك نادر ورقه الاسئله .. ايه الامتحان ده كله طووويل اوي وشكله رخم ليه كده )
مراقب الامتحان : يلا .. كل واحد يقفل ورقته خلاص الوقت خلص ..
نادر : ازاي لسه 5 دقايق ..
راندا : مش ممكن انا ما حلتش حاجه .. شكلي هشيل الماده دي ولا ايه ...!!
المراقب : يلا ...
( يمسك المراقب ورقات تلاجابه الخاصه بنادر وراندا .. ويخرج كل منهم من الامتحان غير راضي تماما عن اجباته ..)
- نادر : الامتحان كان رخم وطويل ..
- راندا : الامتحانات كلها كانت ماشيه تمام .. لازم يضايقونا علي اخر يوم .. دي حاجه تخنق
- نادر : والله عندك حق .. ده انا حتي .. ( تقاطعه راندا )
- راندا : لحظه هرد علي الموبايل ... الو .. كمااان انا عارفه ان اليوم ده نحس النهارده سلام ..
- نادر : في ايه شكلك متعصيه خالص ..
- راندا : هروح في تاكس العربيه مش هتيجي النهارده ..
- نادر : طيب انا هقف معاكي لحد ما تركبي تاكسي .. ولا ااقولك تعالي نتمشي عند اخر الشارع هتلاقي عربيات كتير .. ( محاولا استغلال المشي اطول فتره ممكنه معاها .. )
- راندا : ( ويبدو ان اعجبها الاقتراح ) .. اوكي يلا .. انا كمان حابه اتمشي شوية
- نادر : مش عارف هقعد اسبوعين من غير ما اشوف الجامعه ازاي ..؟؟
- راندا : ( وقد فهمت ما يقصده من تلميح ..) .. عادي بقي دول هما اسبوعين بس
- نادر : ( محدثا نفسه ) .. ااقولهاا علي الرقم ازاي ..؟؟ انا خايف ااقولها تحرجني ..
- نادر : ( متشجعا ً ) انا كنت عايز ..
- راندا : تااااكسي _ كنت عايز حاجه يا نادر .. ؟
- نادر : لالا سلامتك .. يلا سلام .. واجازه سعيده
- راندا : سلام
- نادر : ( يلوم نفسه ) ااااف .. ما انا ماشي طول الطريق اخرس مش قادر ااقول بدري شوية .. ده انا غبي ....
_____________________
الحلقه السابعه ...
( هاتف نادر يرن )
- نادر : الو يا اتش
- هشام : انت فين يا ابني انا بصيت عليك في لجنتك مش لاقيك
- نادر : انا عند اخر شاارع الجامعه
- هشام : تصدق انت عيل ندل _ يعني كنت هتمشي وتطنشني
- نادر : لالا كنت بجيب حاجه بس وراجعلك ..
- هشام : لا خليك انا اللي جايلك .. انت فين بالضبط ..
- نادر : قدام المطعم بالضبط .. يلا تعالي بسرعه بقي _ سلام
- هشام : ثواني واجيلك علي طول ..
( هشام ياتي مهرولا نحو نادر .. )
- هشام : ايه عملت ايه في الامتحان النهارده .. ؟؟
- نادر : مش اد كده ربنا يستر امتحان طويل ورخم ..
- هشام : ربنا يستر انا كمان خايف اوي من الماده دي النهارده .. المهم عايزين نخرج نتفسح النهارده شوية _ ايه رايك ..؟؟
- نادر : أكيد طبعا لازم نحتفل بالحل بتاعنا النهارده .. ده احنا النهارده حلينا حل زي الفل
- هشام : (ضاحكا ) .. ياعم ارحمني بقي هو انا كل ماا انسى هتفكرني ..
- نادر : تعالي نتمشي عند كوبري قصر النيل كده .. عايز اتمشي عند البحر ..
- هشام : ( ضاحكا ) فنان يا ابني والله فنان ... ايه الرومانسيه دي كلها
- نادر : طيب يلا بينا
( ويذهب الصديقين .. عند كوبري قصر النيل )
- نادر : ايه ده .. كل ولد ماشي جنب بنت _ مفيش غيري ماشي جنبك .. ده انا ليه الجنه يا اخي ( ضاحكا ) ..
- هشام : (ضاحكا ) ده انا اللي ليه الجنه اني مصاحبك يا اخي _ صحيح عاملت ايه مع راندا النهارده .. أكيد ما اختش رقمها والا كان زمانك حكيتلي وكان زمانك مبسوط ..!!
- نادر : رقم مين ده انا النهارده اتمشيت معاها بره الجامعه .. ياه لو هي اللي معايا دلوقتي بدالك ..
- هشام : انت بتتخيل يعني ..؟
- نادر : والله العظيم زي ما بقولك _ خرجت معاها واول مره احس انها معجبه بيه بردو
- هشام : ازاي بقي ..؟؟
- نادر : ده احساس انت عمرك ما هتحسه _ بس في الطب النفسي بيقولك ان لو حد بيحبك هتحس بيه من خلال اشارات بتتنقل من جسمه لجسمك ..
- هشام :( ساخرا ) اشارات مرور ..؟؟
- نادر : اسكت انت جاهل اصلا .. المهم .. وخلاص لسه هقولها عايز رقمك ..راحت مواقفه تاكسي ومشيت
- هشام : ياعم كلها اسبوعين وتشوفها مش كتير يعني ..
- نادر : اسبوعين دول كتير جدا عليه _ المهم انا كنت سبت الشغل اللي كنت شغاله علشان الامتحانات _ وصاحب الشغل كان راجل رخم .. ما فيش قدامك شغله لاخوك ..؟
- هشام : في محل ملابس انا شغال فيه وكنت عايز واحد يشتغل معايا هتصل بصاحب المحل ااقوله _ ولو كده ياريت حتي نبقي مع بعض ..
- نادر : ياريت _ عايز اجيب شوية لبس حلوين علشان الترم الثاني
- هشام : ما تزعلش مني .. انت و البيت عندكم اولي بفلوس اللبس دي.. يعني مش لازم تضيع كل فلوسك علي اللبس ..
- نادر : ليه ياعم _ عايز راندا تقول عليه معندهوش لابس ولا ايه ..؟
- هشام : والله انا حاسس ان راندا دي هتوديك في داهيه يا اخي ..
- نادر : نفسي اركب مركب معاها من المراكب اللي هناك دي .. تفتكر ممكن يجي اليوم اللي يحصل فيه ده ..
- هشام : ماشي بتحبك وماشي هتيجي معاك _ وبعدين هتروح تطلب ايدها يعني ..؟؟ وبعدين يجي ابوها يقولك .. انت مش من مستوانا زي الافلام العربي القديمه دي
- نادر : احيانا زي ما بتقولي كلام يفرحني .. بتبقي رخم وبتقولي كلامي يخنقني ..
- هشام : خلاص هكدب عليك بعد كده .. انت ابو راندا اول ما يشوفك هيقولك انت اللي كنت بتمناه لبنتي من زمان كنت فين من زمان ..؟؟
- نادر : ياااااااه عليك يا هشام .. بص هو لو حلم انا مبسوط فيه وعايز اكمله ما تصحنيش بس انت منه ..
( موبايل هشام يرن ...)
هشام : الو _ اخبارك ايه يا استاذ احمد .. انا حليت تمام الحمد لله النهارده ونص ساعه وهكون عندك .. صحيح يا استاذ احمد .. انا عندي واحد صحبي زي اخويا بالضبط كان بيدور علي شغله .. طيب تمام .. تمام .. ماشي عليكم السلام
هشام : بقولك ايه انا لما قولتله .. قاللي هاتوا معاك النهارده .. ولو كده ممكن من بكره تنزل معايا الشغل ..
- نادر : يارب _ طيب يلا بينا
(ويذهبوا الي صاحب العمل ..)
- استاذ احمد : اهلا وسهلا يا شباب _ انت صاحب هشام اللي هتشتغل معانا ان شاء الله ..؟
- نادر : اه انا اسمي نادر
- استاذ احمد : اهلا وسهلا بيك شكلك كتير محترم _ المهم تكون مواعيدك مظبوطه معانا بس .. ولو بكره مناسب ليك انا في انتظارك بكره الساعه 11 الظهر ..
- نادر : اه مناسب جدا ان شاء الله بكره علي 11 هكون هنا _ انا همشي دلوقتي بقي لحسن الوقت ااتاخر _ وفرصه سعيده يا استاذ احمد
- استاذ احمد : انا اسعد يا نادر ونتمني انك ترتاح معانا .. مع السلامه
( يدق الباب )
- الام : ايه يا نادر ليه التاخير ده كله ..
- نادر : معلش يا ماما بس كان هشام جايبلي شغلانه كده .. قولت بدل الفراغ بتاع الاجازه .. وهنزل من بكره ان شاء الله
- الام : طيب انزل ولو ما ارتحتش فيه بلاش .. تعالي علشان عندنا ضيوف خالتك وابنها
- نادر : خالتوااا هدى حبيبتي ..
- هدي : لو حبيبتك كنت سألت يلي مش بتسال انت خالص
- نادر : معلش والله غصب عني الامتحانات بس _ طارق اخبارك ايه ..؟
- طارق : الحمد لله .. تمام وانت ..؟ا
- نادر : تمام الحمد لله _ طبعا هتباتوا معانا النهارده ..
- طارق : ان شاء الله علشان بكره نخرج سوا
( ثم يذهب طارق ونادر .. الي غرفه نادر ويغلقا الباب ..)
- نادر : كان نفسي اخرج معاك بكره .. بس للاسف ورايا شغل ..
- طارق : شغل .. شغل ايه ياعم ..؟؟ عيش سنك .. !
- نادر : ياعم وهو انا ميت ..؟؟ بس الواحد لازم يتعود علي الشغل من صغره
- طارق : ياعم ده كلام الناس بتصبر بيه روحها بس .. انا عمري ما اشتغلت مع الدراسه معني كده اني فاشل ولا يعتمد عليه ..؟
- نادر : ما قولتش كده .. بس الشغل مش عيب
- طارق : لا عيب تشتغل عند واحد ويعاملك زي الزفت ويذل فيك .. ليه يعني كل ده ..
- نادر : ( وقد انتهي صبره ) هو مش ذل ولا حاجه .. بس في ناس مريضه نفسيا بس هي اللي بتشوف ده غلط ..في ناس كتير بتعامل الناس حلو _ ثم ده راجل محترم جدا .. ولو الشغل ماعجبنيش .. خلاص هقوله سلام
- نادر : ( محدثا نفسه ) دلوقتي بس عرفت قيمتك يا هشام ده انت نعمه .. مش ده اللي الواحد يتكلم معاه يتخنق ..
- طارق : انا خارج ااقعد مع خالتو شوية ..
- نادر : ماشي انا هغير هدومي واجي ااقعد معاكم شوية ..
- نادر : ( محدثا نفسه ) ياتري يا راندا اخبارك ايه ...
( وبعد اسبوعين من الشغل .. وتقترب ايام الدراسه .. )
- نادر : استاذ احمد .. انا مرنب الاسبوعين هاخد بيه لبس ..
- استاذ احمد : شوف اللي عايزه .. خدو واكيد ليك خصم كويس
- نادر : متشكر جدا ربنا يخليك
( ويذهب نادر الي منزله .. )
- الام : نادر ايه الشنط اللي معاك دي ..؟؟
- نادر : دي هدوم ليه يا ماما .. كنت عايز اجيب لك اي حاجه بس للاسف الفلوس ما كفتش _ بس المرتب اللي جاي هيكون كله ليكي
- الام : انت لما تجيب لنفسك .. كأنك جبت ليه بالضبط .. بس يا نادر مش ملاحظ ان اللبس كده كتير ..؟؟
- نادر : مش في جامعه يا ماما .. اصحابي كلهم في الجامعه بيلبسوا لبس جديد علي طول
- الام : خلاص ما تضايقش نفسك اوي كده .. بس عايزه ااقولك ان الناس مش زي بعضها _ يعني لو الناس بتعمل حاجه غلط مش تعمل زيهم .. انا ما بقولش ما تجبش لبس .. بقول تجيب بس في المعقول .. لكن مش بالفلوس كلها تجيب لبس ..
- نادر : ( بصوت غاضب ) .. غيري يا ماما ما بيشتغلش واحلي لبس بيجيله لحد عنده انا مش هشتغل واتعب وتقوليلي اشتري ده وما تشتريش ده _ دي فلوسي اللي تعبت بيها .. كنتي جيتي سمعتي ابن اختك طارق وهو عمال يبهدلني تريقه .. وكان ناقص يقولي يا شحات .. كان بيقولي كلام زي السم ..
- الام : ( غاضبه .. ومندهشه ) هو مش طارق ده اللي مش عاجبك طول عمره وبنبص ليه علي انه انسان فاشل .. ده مش كان رايك فيه .. ده مش بيشرب سجاير وهو في اعدادي .. ده انسان معندهوش اي فكره عن تحمل المسئوليه .. كانت العيله كلها بتضرب بيك المثل وباخلاقك وكانوا يقولوا عليه فاشل .. لكن انت دلوقتي _ بقيت قليل الادب وبتتكلم مع امك باسلوب مش محترم .. ولا عندك اي نوع من تحمل المسؤليه .. هتعمل ايه امال لو انا كنت محتاجه لفلوسك ..؟؟ كنت ذلتني .. انا مكنتش عايزة حاجه منك بس كنت تشيل الفلوس دي معاك يمكن تحتاجها في حاجه .. مش كل اللي معاك يتصرف انت بقالك مده واخلاقك بقت زي الزفت .
- نادر : ( يغادر المنزل .. ومحدثا نفسه ) انا خلاص قرفت من كل حاجه
(يمسك موبايله يتصل بصديقه هشام )
- نادر : ايوة يا هشام .. قابلني دلوقتي .. عايزك ضروري _ سلام
( ثم يتقابل الصديقين )
- هشام : خير يا ابني في ايه ؟؟
- نادر : اتخنقت مع ماما وسبتلها البيت _ وهبات معاك النهارده
- هشام : لالالا طبعا انت بتهزر _ تبات معايا في اي وقت .. بس مش وانت متخانق مع امك ..
- نادر : انا حاسس انها بتتلكك ليه .. علشان اشتريت هدوم ..
- هشام : علشان اشتريت هدوم .. ولا علشان صرفت فلوسك كلها علي الهدوم .. في فرق انا كمان مكنتش راضي عن اسلوبك وانت عارف ده كويس ..
- نادر : يعني انت شايف اني غلطان ..؟؟
- هشام :اه غلطان .. وعايز تزعل ازعل الحق ما يزعلش ..
- نادر : معلش ياهشام .. انا هتمشي شوي واروح اعتذر لها ..
- هشام : اجي اتمشي معاك طيب
- نادر : لالالا معلش انا عايز اتمشي لوحدي شوية ...
- هشام : خلاص اللي يريحك
- نادر : معلش بقرفك معايا .. يلا سلام
- هشام : لالا ابقي طمني عليك بس ... علي فكره الدراسه بعد بكره وهتشوف راندا ياعم تاني
- نادر : ( يبتسم ) ياعم وده وقته يلا سلام
***************************************
الحلقه الثامنه ...
( يرجع نادر المنزل في وقت متاخر بعد ان قضي وقت كبير في المشي .. فيجد باب الشقه لم يغلق جيد .. فيدفع الباب بيده .. فاذا هو مفتوح .. يبحث في المنزل بعينيه عن امه كي يعتذر لها بعد ان شعر انه اخطأ .. فيدخل غرفتها .. فيجدها نائمه .. فيغلق غرفتها عليها ويعاود الي غرفته ..)
- الام : ( محدثه نفسها ) ليه كده يانادر .. كبرت وصوتك علي عليه ..
- نادر : ( محدثا نفسه ) ايه اللي جرالك يا نادر ...
( بعد ان يأس من محاوله النوم _ يذهب الي غرفه والدته )
- نادر : أمي .. أمي _ انا عارفك انك صاحيه ومش عايزة تكلميني .. وعارف اني غلطان معلش يا ماما .. بجد انا اسف ولو علي الهدوم انا هرجعها كلها بكره _ ماما بجد انا مش عارف انام طول ما انتي زعلانه مني _ بجد سامحيني
( فيذهب اليها محاولا تقبيل يدها ..)
نادر : ماما انتي بتعيطي ...
( فيحاول مسح دموعها بيده .. وتنزل دموعه هو الاخر _ فعندما ترى امه انه بكى .. لا تستطيع تمالك نفسها .. فدون ان تشعر تاخذه في حضنها .. ويبكي كل منهم .. ويقبل نادر يد والدته وسط البكاء يعلوا منه .. ويردد .. انا اسف يا امي .. سامحيني يا امي ..
الام : اتعشيت ولا اجيبلك تتعشي ..
نادر : يا ماما عشى ايه بس .. فوليلي سامحتك بس علشان ارتاح .. اكل ازاي وانتي غضبانه عليه ..
( هنا تضم الام نادر الي حضنها .. وتقبل راسه )
- الام : ما اقدرش ما اسامحكش .. ده انت حته مني يا نادر ..
( وهنا يتغير وجه نادر .. وكأنه ازيل جبل من علي صدره )
- نادر : اوعدك مفيش حاجه هتكرر من دي تاني ..
- الام : تعرف يا نادر الامام احمد ابن حنبل ..؟؟
- نادر : أكيد طبعا ً يا ماما .. اشمعني ..؟؟
- الام : تعرف ان حذاء الامام احمد ابن حنبل .. بقي حذاءه معه 17 سنه يرقعها ويخيطها .. ويأكل اللحم في الشهر مره .. هل ده قلل منه ولا من مكانته ..؟
- نادر : أكيد لا طبعا .. وانا اتعلمت الدرس خلاص ..
- الام : طبعا الزمن اختلف دلوقتي وكل حاجه .. يبقي نمشي بالمعقول وخير الامور الوسط
- نادر : طبعا .. اكيد .. ان بس طارق كلامه كان مأثر فيه اوي ..
- الام : تاني طارق ..!! في حكمه يا نادر بتقول .. من شجره واحده تصنع مليون عود كبريت .. ويمكن لعود كبريت واحد ان يحرق مليون شجره .. علشان كده ما تخليش شىء واحد سلبي .. يأثر علي ملايين الايجابيات في حياتك ..
- نادر : (ضاحكا ) انا حاسس اني قاعد مع عمرو خالد او ابراهيم الفقي ..
- الام : (ضاحكه ) .. انتي بتتريق عليه كمان
- نادر : لا والله العظيم بكلم جد .. انتي جبتي الحاجات دي منين ..؟؟
- الام : ربنا يبارك في اصحاب القنوات الدينيه ..
- نادر : الحمد لله ان ليه ام زيك .. مش زي الامهات اللي ليل نهار قدام الاقلام والمسلسلات ..
- الام : ربنا يهديهم يا نادر .. اجيبلك تتعشي بقي ..؟
- نادر : ماشي يا ست الكل ..
( وبعد ان يتعشي .. يدخل غرفته محاولا النوم بعد مناقشه طويله مع الام .. وعندما يحاول النوم .. يرن الهاتف ..)
- نادر : الو يا اتش ..
- هشام : طمني عليك .. روحت البيت ..؟؟
- نادر : اه من بدري ..!! وخلاص اعتذرت لماما _ وكأن مفيش حاجه حصلت خلاص الحمد لله
- هشام : الحمد لله ..
- نادر : بجد والله انت صاحب ما تتعوضش .. ربنا يخليك ليه
- هشام : ( ضاحكا ) شفت بقي انه مش خساره فيه العزومه اللي انت عزمتهالي ..
- نادر : لا طبعا .. وهو انا عبيط .. ما انا عزمتك علشان يبقي ليه عين ااقرفك بعدين ..
- هشام : ده انا والله كنت مضايق اوي علشانك .. انت ما تعرفش معزتك عندي _ وقولت مش هنام غير لما اطمن عليك _ وربنا يعوض عليه في ال 3 دقايق اللي هكلمك بيهم ( ضاحكا )
- نادر : ( ضاحكا هو الاخر ) ماشي يبقالك عندي 1.5 ثمن المكالمه يا عم _ وعلي العموم شكرا علي سؤالك بجد ..
- هشام : احنا اخوات عيب عليك ولو انا مكانك كنت هتعمل معايا زي ما انا عملت معاك كده بالضبط .. يلا تصبح علي خير وسلملي علي ماما ..
- نادر : الله يسلمك .. وانت من اهله ..
( وبعد فتره اجازه الترم الاول .. تعود الدراسه من جديد .. ويشرق الصباح .. ويرتدي نادر إحدى ملابسه الجديده ..)
- هشام : صباح الورد علي عيونك
- نادر : حبيبي .. وحشتني انت والجامعه .. ( يقاطعه هشام )
- هشام : هاا .. كمل ومين تاني ( ضاحكاا )
- نادر : ( ضاحكا ) .. لا طبعا .. أ كيد المدرجات وحشتني ..
- هشام : يا واد يا كداب .. يعني انت كده متشيك ليه انا والجامعه بس ..!!
- نادر : اه طبعا .. امال يعني هيكون لراندا ( فيضحك الاثنين ضحكا متواصلا ..) _ ماشفتهاش صحيح ..؟؟
- هشام : ياعم شوية وتيجي ..؟؟
- نادر : قول يارب بس .. لحسن تحسدها وما تجيش النهارده ..
- هشام : يارتنا كنا افتكرنا ربع جنيه ..
- نادر : ( ينظر بلهفه ).. ااف .. ايه الشياكه بتاعتها دي .. اروح اكلمها .. ولا اعمل نفسي مش واخد باللي ولا ايه ...؟؟
- هشام : يا عم هو انا خلفتك ونسيتك .. اعتمد علي نفسك يا عبود .. اجري عليها وقول صاعقه .. صاعقه .. ( فلا يتمالك نادر نفسه من الضحك .. ) _
- نادر : اهي دخلت المدرج انا هدخل وراها يا عم .. تعالي معايا .. بس انا لما اروح عندها انت ااقعد بعيد وخليك خفيف ( ضاحكا )
- هشام : يلا ياعم ..
( نادر يمشي باتجاه راندا .. ويمشي بجواره هشام .. وكأنه يدخل بالصدفه ولا يرى راندا .. ثم يظهر انه تفاجىء بها في وجه ... )
- نادر : ايه ده راندا .. مش ممكن .. اخبارك ايه ..؟
- راندا : نادر .. ازيك انت ...؟؟ _ اخبارك ايه ..؟؟
- نادر : الحمد لله تمام _ انتي هنا من بدري .. ؟؟
- راندا : ابدا ً لسه جايه من شوية صغيرين .. بس رحت علشان استلم الكتب .. لقيته زحمه اوي .. فسبتهم وجيت ..
- نادر : طيب هاتي الوصل وانا هاجي معاكي .. انا هعرف اتصرف واجيبلك الكتب ..
( تفتح راندا شنطتها .. وتطلع الوصل .. )
- راندا : بس انا مش عايزة اتعبك معايا ... انا كده كده مش مستعجله عليهم يعني ..
- نادر : ( ماسكا الوصل من يدها .. ويبص في الوصل ويبتسم ) .. غريبه دي ..؟
- راندا : ايه اللي غريب بقي ..؟
- نادر : اصلي لاحظت ان اسم راندا هي نفس حروف اسم نادر ...!!
راندا :( تبدو مندهشه ) .. تصدق فعلا .. لا ما شاء الله عليك عندك قوه ملاحظه ش( يشاور نادر لهشام .. الذي انتظر نادر بعيدا ً .. )
- نادر : يعني مش اي حاجه بلاحظها .. بس اسم راندا مميز عندي بحبه جدا
- راندا : ( تبتسم ابتسامه خجل ).. ربنا يخليك ده من ذوقك بس
- نادر : خليكي هنا .. انا 10 دقايق وهجيلك ومعايا الكتب ..
- راندا : طيب لو لقيته زحمه بلاش تتعب نفسك وابقي اجيبه بعدين ..
- نادر : ماشي حاضر ..
( ثم يذهب باتجاه هشام ..)
- نادر : تعالي نجيب لها الكتب ..
- هشام : ياااه لو الشباب كلها زيك كده .. فيهم الشهامه دي .. ( ضاحكا )
- نادر : لالا مستحيل تلاقي حد زي نادر ( ضاحكا ) _ صح يا نادر عايز ابقي اعرفك عليها .. انا بثق فيك جدا .. وبعتبرك زي اخويا ..
- هشام : لا ياعم .. لحد هنا وستوب .. انا ما بحبش التعارف ولا الحوارات دي .. انا واخد علي نفسي عهد ادخل الجامعه من غير ما اتعرف علي بنت ..
- نادر : تصدق انا كنت متردد بردو .. بس انت ريحتني ( ضاحكا )
- هشام : يلا اي خدمه يا عم .. يلا خش بقي في الهيصه دي هاتلها الكتب انا مستنيك هنا
- ( يدخل نادر في الزحام ويغيب ل 10 دقائق .. ثم يعود بالكتب )
- نادر : يلا ياعم ..
- هشام : يا يانادر يعني لو انا بنت كنت هتجبلي الكتب كده ( ضاحكا )
- نادر : لا طبعا ولا هعبرك .. بشكلك ده .. ساعتها كنت انت اللي هتجبلي الكتب بردو علشان اتجوزك ( ضاحكا )
- هشام : ماشي ياعم .. يا بختك يا ست راندا .. بتلاقي اللي يجبلك الكتب ..!!
- نادر : يلا انا هروح اوديلها الكتب وااقعد معاها 10 دقايق واجيلك .. لحسن شكلها مفيش فيها محاضرات النهارده .. والدكاتره مقضينها استهبال ..
- هشام : اوكي مستنيك .. مع اني عارف مش هتيجي غير بعد 10 ساعات ..
- نادر : احمد ربنا لو جيت لك اصلا .. حد يسيب القمر ده ويجي لهشام ده .. يا اخي راعي شعوري ..
- هشام : ( ضاحكا ) .. صح ده تجيله وانت في مشكله بس ..
- نادر : يا اخي يعني انت هتحللي المشكله بوشك ..
- ( فيعلوا صوت ضحكهم .. فتنظر راندا علي مصدر الصوت .. فتجدهما ومعهما الكتب .. فيذهب اليها نادر ..)
- راندا : مش عارفه ااقولك ايه بجد .. ميرسي جدا .. ربنا يخليك
- نادر : انا معملتش اي حاجه .. اي شاب عنده دم هيعمل اللي انا عملته واكتر شوية ..
- راندا : لالا بالعكس انت ذوق جدا ً
- نادر : ربنا يخليكي يارب .. ده انا كده هصدق بجد ..
- راندا : انا خايفه اكون بكلمك معطلاك عن صاحبك ..
- نادر : لالا خالص .. انا قولتله يجي يقعد معانا .. بس هو مش حابب قالي سبني لوحدي
- راندا : اه شكله بيحب التأمل ..
- نادر : هيتأمل في ايه هنا ... ده هو بس عنده حياء شديد اوي .. بجد من الناس اللي انا بحبها جدا .. اعز صديق ليه
- راندا : ربنا يخليكوا لبعض ..
- نادر : ربنا يخليكي ...
( فيعم الصمت .. للحظات )
- نادر : (دون اي مقدمات ) .. انتي مرتبطه .. ؟؟
- راندا : ( ويبدو عليها الاندهاش ) .. نعم ...؟؟
- نادر : ( يتكلم بخجل بعد ان احمر وجه ) لا بس بسألك انتي مرتبطه ..؟؟ _ سؤال عادي يعني ولو مش عايزة تقولي عادي .
- راندا : لا لا خالص مش هقول ليه .. انا مش مرتبطه ..
- نادر : ( وقد ابتسم ابتسامه رضا ) .. ربنا يكرمك بـ ابن الحلال ..
- راندا : انا اشوف دراستي بس دلوقت .. وحكايه الجواز والحب والحاجات دي تيجي بعدين ... ده مش وقتها خالص ..
- نادر : انا معاكي .. وده نفس تفكيري انا كمان ..
- راندا : ازاي بقي هو في ولد ما يعرفش بنات .. ويلعب بدي ويتسلي بدي ...
- نادر : لا والله العظيم .. عمري ما قولت لبنت بحبك ابدا ً
- راندا : ( تبتسم ابتسامه رضا ) : الصراحه انا حسيتك شخص كتير محترم .. غير شباب الجامعه هنا .. كل واحد عايز يحط علي موبايله اكبر عدد من ارقام البنات .. ويقعد وسط اصحابه يقولهم .. بص معايا كام رقم .. بحسهم شباب تافه اوي ...
- نادر : لالا انا الحمد لله موبايلي مفيش عليه ارقام بنات خالص مفيش غير هدي ..
- راندا : ( وقد انزعجت ) .. مين هدى ..
- نادر : ( ضاحكا ) .. دي خالتي ..
- راندا : (ضاحكه ) .. اه خالتك .. اسم خالتك جميل اوي ..
( راندا .. تنظر في ساعتها )
- راندا : ياه كل ده ومفيش ولا دكتور دخل .. انا قوم امشي بقي لحسن ده الوقت عدي بسرعه ..
- نادر : طيب سيبي معايا نص الكتب كتير كده عليكي والمحاضره اللي جايه خديهم لحسن كده هيبقوا تقال اوي عليكي ..
- راندا : لا لا مش للدرجه دي ربنا يخليك ..
- نادر : طيب انا هاجي اوصلك لحد بره الجامعه حتي ..
- راندا : لو كده ماشي .. مع اني مكسوفه منك بصراحه ...
( يخرجوا سويا من باب الجامعه .. )
- نادر : هتركبي تاكسي .. ولا حد هيجي ياخدك ..
- راندا : لا هركب تاكس _ خلاص بقي امشي انت وانا هستني مش عايزه اعطلك ..
- نادر : لالا ما ينفعش علشان محدش يضايقك بس ..
- راندا : والله بتعبك معايا ..
- نادر : انا عايز اطلب منك حاجه .. ولو مش هينفع قولي لاء مش هينفع وخلاص .. وانا مش هزعل عادي .. يعني ..
- راندا : اتفضل اطلب ..
- نادر : كنت عايز اخد رقم موبايلك علشان اطمن عليكي لما تروحي ..
- راندا : ( مندهشه من طلبه ) .. رقمي انا .. !!
- نادر : انا عارف مش هترضي _ خصوصا بعد اللي حكتيه جوه .. خلاص اعتبريني ما قولتش اي حاجه بجد .. انسي اني طلبت الرقم ...
- راندا : اصل الصراحه ما ادتش رقمي لحد قبل كده .. والصراحه انا اعرفك من مده صغيره
- نادر : خلاص والله .. انا كنت علشان اطمن عليكي بس
- راندا : بص انا فعلا والله العظيم عمري ما اديت رقمي لحد قبل كده .. بس انا عارفه انك كتير شهم وجدع .. وغير الشباب اللي حكيت عنهم .. طيب اديني موبايلك كده ..
( تاخد موبايله .. تكتب رقمها عليه )
- راندا : ده رقمي يا نادر سجله عندك بقي ورنلي هسجل رقمك ..
- نادر : ( صامتا .. لا يستطيع التحدث من السعاده ) .. بجد شكرا اوي علي ثقتك دي يارب اكون ادها ..
- راندا : علي فكره في 20 تاكسي عدوا واحنا عمالين نتكلم .. ( ضاحكه )
- نادر : ( ضاحكا ) تصدقي انا كنت ناسي انا واقف ليه ...
( فيضحكوا .. وهنا يمر تاكسي بجوارهم )
- نادر : تاااااااااااكسي _ هينفع اكلمك النهارده ..
- راندا : لو عرفت ارد عليك هرد .. لو معرفتش هكنسل عليك .. انت تعرف بقي اني مش هعرف ارد عليك .. ماشي يلا سلام
- نادر : سلام .. ( وينظر لسياره التاكسي مودعا راندا بعينيه .. حتي تتلاشي من امامه .. ثم يقبل هاتفه .. قائلا : اخدت الرقم .. اخدت الرقم ..)
*****************************************************
الحلقه التاسعه ...
لمشاهده الجزء الثالث من المسلسل أضغط هنا
ليست هناك تعليقات:
إرسال تعليق