الجزء الثالث من المسلسل

الحلقه التاسعه ...

( يمضي نادر نحو المنزل ... قائلا لنفسه اسجلها ايه علي الموبايل .. رورو ولا ريري ..! ولا اسجلها راندا وخلاص لحسن لو عرفت ما تزعلش .. ويدخل منزله مغنيا ... وحياه قلبي وافراحه وهناه في مساه وصباحوا )

- الام : ااايه يا عندليب مالك جاي النهارده مبسوط كده ... هي شاديه كانت راضيه عنك النهارده ولا ايه .. ( ضاحكه )

- نادر : اه يا امي وكمان اختها قدامي علي العجله .. اصلنا بنصور الجزء الثاني بتاع معبوده الجماهير ( ضاحكا )

( فلا تتمالك الام نفسها من الضحك )

- الام : ياخوفي في الاخر تحب واحده زي نعيمه الصغير ولا عائشه الكيلاني ... ( ضاحكه )

- نادر : ليه بس كده الاحباط ده ... علي العموم انا داخل جوه شوية الاوضه هغير واجي اتفرج معاكي علي التليفزيون .. !!

( يدخل نادر غرفته .. يمسك موبايله .. ثم يغلق باب غرفته بهدوء تاااام .. ودقات قلبه اصواتها تعلو .. وتعلو )

- نادر : ياتري هترد ولا هتكنسل ..؟؟ _ الو ..!!

- راندا : ( بصوت هادىء ) الو ازيك اخبارك ايه ..؟؟

- نادر : انا تمام الحمد لله مال صوتك ..؟؟

- راندا : لا ابدا اصلي بكلمك من البلكونه وخايفه حد يسمع

- نادر : ( ضاحكا ) .. طيب خدي بالك بقي لحسن الحكومه تعمل كابسه عليكي

- راندا : ( ضاحكه ) .. يخرب عقلك هيسمعوا صوتي وانا بضحك وشكلي هروح في داهيه بسببك ..!

- الام : ( تفتح باب الغرفه فجاءه ) .. نادر تشرب شاي معايا ..؟؟

- نادر : ( مرتبكا ) .. طيب سلام .. سلام انت يا هشام دلوقت

- راندا : ( ضاحكه ضحكا هيستريا ) هي الحكومه مسكتك انت ..

- نادر : ضاحكا .. اه _ هحاول اكلمك تاني بعدين سلام

- الام : هاا يا ابني اعملك شاي معايا ...؟؟

- نادر : ماشي يا ست الكل .. !

( موبايل نادر يرن )

- نادر : الو يا هشام ..

- هشام : ايه يا نادر اخبارك ايه ..؟؟

- نادر : اه كويس جدا

- هشام : ايه اللهجه دي يا ابني انت .. مالك ..؟؟ _ ثم مشيت النهارده من غير ما تقولي ده انت بقيت وحش اي ..

- نادر : ياعم عيب عليك هفهمك كل حاجه بعد بكره ..

- هشام : تفهمني ايه يا ابني .؟؟

- نادر : مش هينفع دلوقت ..؟؟

( الام وبدأت تشعر ان نادر لا يريد ان يتحدث امامها .. فتخرج من الغرفه )

- الام : هروح اشوف الشاي ..

- نادر : ماشي يا امي .. _ خلاص يا اتش سلام بقي وبعد بكره هفهمك ..

- هشام : سلام يا جميل

( تدخل الام الغرفه .. وتحمل صينيه عليها كوبين الشاي )

- الام : هو في ايه كده كنت بتكلم هشام بعدين قفلت .. بعدين اتصل تاني .. في حاجه ولا ايه ..؟؟

- نادر : ابدا هو بس بيحب يرغي شوية

- الام : اااه ( ويبدو عليها .. عدم الاقتناع بكلام نادر )

- نادر : انا هشرب الشاي وااقوم اخد شور ..

- الام : شور ايه ده ..؟؟

- نادر : ( ضاحكا ) .. هخش استحمه يعني ياماما

- الام : ( ضاحكه هي الاخرى ) الله يرحم ابوك يا سي نادر

- نادر : تسلم ايدك يا ست الكل كوبايه شاي زي الفل ..

- الام : صحه وهنا .. يا حبيبي ..

( يغادر نادر غرفته .. فيدخل الحمام .. )

- الام : ( محدثه نفسها ) .. ياتري مخبي عليه ايه يا نادر ..؟؟

( هنا ... موبايل نادر يرن .. فتنظر الام فيه فتجد اسم راندا .. !! .. فتمسك الهاتف تتفحص جميع الاسماء فلا تجد اسماء غريبه غير اسم راندا فقط ... فتحضر ورقه وقلم وتنقل رقم راندا ... ورقم هشام ايضا ً .. )

- الام : يا نادر موبايلك كان بيرن .. شكله هشام ..

- نادر : خلاص يا ماما انا شوية وخارج سبيه يرن ..

( يخرج نادر من الحمام .. مهرولا نحو هاتفه .. يمسك به )

- نادر : ماما مش مكتوب ان حد اتصل ..!!

- الام : لالا اصلي مسكت الموبايل فايدي جت من غير ما اقصد علي الزراير ..!! بس ما لحقتش ابص علي ما جيت ابص كان خلاص بطل يرن ..!!

( يمسك الموبايل نادر .. ثم ينظر بدهشه .. ! )

- الام : ايه يا حبيبي .. مش هشام بردو اللي بيتصل ..؟؟

- نادر : اه هو يا ماما .. هو فيه غيره دايما قارفني كده .. !!

- الام : طيب ما تكلموا يا حبيبي شوفه عايز ايه ..

- نادر : بعدين بقي يا مااما ..

- الام : انت مش معاك رصيد ولا ايه ..؟

- نادر : لا بس هكلمه بعدين .. بعدين .. !!

- الام : علي راحتك حبيبي .. علي العموم انا نازله اشتري شوية حاجات من السوق وجايه

- نادر : ( مبتسما ) .. ماشي يا ست الكل ..

( تخرج الام من المنزل ... ) فيهرول نادر ماسكا موبايله )

- نادر : الووو ..

- راندا : ( ضاحكه ) .. الوو

- نادر : معلش معرفتش ارد عليكي .. اصل كنت باخد شور ..

- راندا : لا لا ولا يهمك _ بس انت ليه ما قولتش لماما انك بتكلمني ..؟؟

- نادر : الصراحه معرفش .. خفت تزعل مني .. اصلي بحبها اوي وبخاف علي زعلها جدا ..

- راندا : ربنا يخليهالك ..

- نادر : ويخليكي يارب .. وربنا يسامحك ..

- راندا : ربنا يسامحني ..؟؟ علي ايه ..؟؟

- نادر : علي انك هتخليني مش هعرف انام النهارده من السعاده ..

- راندا : ( تضحك ضحكه خجل ) .. مش اوي كده يعني _ ثم انا كمان مبسوطه اني كلمتك ..وعلي العموم مش هكلمك تاني ياسيدي علشان تعرف تنام براحتك ..

- نادر : لالالالالالالالا .. بالعكس .. ده انا مش هعرف انام بعد كده غير لو سمعت صوتك كل يوم ..

- راندا : انت اتغيرت خالص ليه كده .. في الموبايل غير نادر بتاع الجامعه ..!!

- نادر : طيب انهي افضل ... !!

- راندا : الاتنين واحد طبعا ... يلا سلام _ ماما بتنادي ..

( نادر يغلق معها وهو غايه في السعاده ... )

- نادر : ( محدثا ً نفسه ) .. والله العظيم شكلها بتحبي هي كمان دي بتبقي مبسوطه وانا بكلمها ... طيب وبعدين .. !! ايه الحل .. !!

- الام : نااادر افتح .. !!

- نادر : حاضر يا امي ..

- الام : بقولك يا حبيبي .. انا كنت جايبه فاكهه .. بس الشنطه كانت تقيله عليه .. فدفعت فلوسها _ وقلت لعمك صالح هبعتلك نادر يا خدهم ..

- نادر : ماشي يا ماما _ عايزة حاجه تاني من تحت .. !!

- الام : لا شكرا ً يا حبيبي ..

( فيغادر نادر المنزل وقد ترك هاتفه .. فتنظر الام فتجد الهاتف .. فيدفعها الفضول لمسكه والبحث فيه .. فتجد انها تحدث مع راندا 5 دقائق .. فتعلم ان هناك شىء ما بينهما .. )

- نادر : ماما انا جبتلك الحاجه اهوة _ انا هدخل انام شوية بقي ..

( ويدخل نادر غرفته .. ويمسك هاتفه .. ثم يدخل علي الرسائل ويكتب .. انا بحبك اوي يا راندا .. واتمني انك تكوني زوجه ليه في يوم من الايام .. ولكنه لايمتلك الشجاعه ليضغط علي كلمه .. ارسال .. فيلقي بالموبايل علي الكنبه ... ويحاول النوم _ ثم لايسطيع النوم .. فيمسك هاتفه بسرعه وقد استجمع شجاعته كلها .. ويضغط ارسال .. فيشعر بالندم .. ويلوم نفسه خوفا ان يخسرها .. )

- نادر : ( محدثا ً نفسه ) .. ياتري هتعمل ايه دلوقت .. هتبعتلي مسج تقولي وانا كمان ولا تمسح رقمي .. ولا .. ولا ... !!

( وياتي صباح يوم جديد )

- نادر : ( محدثا نفسه ) .. وبعدين انا خلاص مش قادر اتحمل ..!

( فيمسك موبايله .. فيتصل بها .. فيجد الهاتف مغلقا ً )

نادر : قفلت موبايلها ... يبقي ملهاش غير معني واحد .. اني خلاص خسرتها طيب يا تري هتعمل ايه فيه لما تشوفني ... !! معرفش انا ازاي عملت كده ... هو انا غبي للدرجه دي ..؟؟

- الام : مالك لابس كده رايح فين ..؟؟

- نادر : لا ابدا هنزل اتمشي شوية .. !!

- الام : ( محدثه نفسها ) .. بس لو اعرف في ايه يوم تضحك وتبقي طاير من الفرح .. ويوم قالب وشك ... !!

( يغادر نادر المنزل )

- الام : انا بقي مش هفضل زي الاطرش في الزفه .. !!

( تمسك الموبايل .. تتصل بهشام )

- هشام : الو

- الام : الو ازيك يا هشام يا ابني .. انا ام نادر ..

- هشام : ( مستغربا ) .. اه اه .. اهلا وسهلا اخبارك حضرتك ايه _ هو نادر كويس .. !

- الام : اه كويس بس نزل .. بتصل بيه شكل موبايله فصل شحن قولت اكلمك يمكن يكون خرج معاك او حاجه ..

- هشام : لالالا انا في البيت ..

- الام : اه هو كان بيكلم راندا في الموبايل ونزل ..

( هنا يعجز هشام عن النطق )

- الام : هشام انت معاايا .. !!

- هشام : اه طبعا معاكي .. راندا مين .. !!

- الام : راندا يا هشام انت لسه صاحي من النوم ولا ايه ..؟؟

- هشام : اه اه قصد حضرتك راندا اللي معانا في الجامعه .. !!

- الام : ااااااه هي دي _ هو في غيرها .. !!

- هشام : لا بس بحسب حضرتك ما تعرفهاش .. !!

- الام : لا ازاي بقي هو نادر بيخبي عليه حاجه . . !

- هشام : يلا ربنا يهنيهم مع بعض .. !!

- الام : طيب الباب بيخبط شكله نادر .. سلام دلوقت .. !!

( تذهب الام لتفتح الباب .. فتجد احدى جيرانها تسالها عن شىء ما )

( علي الجانب الاخر .. يرن هاتف نادر ... )

- هشام : الو يا نادر ..

- نادر : ايه يا اتش اخبارك ايه ..؟

- هشام : تمام _ انت كنت قافل موبايلك ليه .. ؟؟

- نادر : لالالا مفتوح ما قفلتهوش خالص ..

- هشام : اصل والدتك لسه مكلماني وسالتني عليك .. وسالتني علي راندا

- نادر : ( مقاطعا هشام .. ) .. يخربيتك وقولتلها اييييييييييه ... !!

- هشام : ما قولتش حاجه ..!!

- نادر : طيب سلام اروح اشوفك نيلت اااايه ...!!

( نادر يدخل البيت .. متوترا ً )

- نادر : ماما انتي اتصلتي بهشام ..؟؟

- الام : اه

- نادر : جبتي الرقم منين ..؟؟

- الام : من موبايلك ..؟؟

- نادر : اتصلتي ليه ..

- الام : هو تحقيق ولا ايه ..؟؟ _ اتصلت اعرف ابني مخبي عليه ايه ... !! مين راندا دي ..؟؟

- نادر : انا كنت هحكيلك كل حاجه .. !!

- الام : طيب وايه منعك .. ااقعد حالا واحكيلي .. كل شىء بالتفصيل ....

- نادر : ( بعد ان حكي لها كل القصه بصراحه ) .. بس يا ماما هو ده اللي حصل بالحرف الواحد .. !!

- الام : شايف اللي عملته ده صح ..؟؟

- نادر : مش عارف _ بس أكيد .. غلط .. علي العموم انا نازل بكره الجامعه وهنشوف هيحصل ايه .. !!

- الام : هو انا مش ضد انك تحب بنت وتفكر بالجواز منها .. بس دي انت ما تعرفهاش اصلا .. !!

- نادر : انا هروح انام دلوقت وبكره هروح الجامعه ونشوف الحكايه دي .. !!

( فيدخل غرفته .. ويتصل مره اخرى بـ راندا .. فيجد هاتفها مغلق .. !! )

ويشرق شمس يوم جديد ...

( يدخل جامعته .. ويبحث بعينيه عنها .. فيذهب اليها .. ولكنها عندما تجده قادم اليها .. تحمل حقيبتها وتصرف وجهها عنه .. وتسرع لتغادر القاعه ..)

- نادر : ممكن لو سمحتي كلمه واحده ...؟؟

( راندا تمشي ولا تبالي كأنها لا تسمعه .. او يحدث نفسه .. )

نادر : علي فكره المسج جالك غلط ... !!

( هنا يتدخل شخص اخر من الجامعه ... !! )

- طالب الجامعه : ماااااااالك بيها يا استاذ ..!!

- نادر : ياعم مالكش دعوه دي زميلتي .. !!

- طالب الجامعه : ازاي ماليش دعوه .. !

( هنا تدخل راندا .. لتنهي المشكله .. )

- راندا : سيبه مالكش دعوه ده صديقي .. !!

- طالب الجامعه : خلاص حقك عليه _ انا غلطان يا ستي .. !

- نادر : علي فكره المسج جه غلط ..

- راندا : انا عارفه انه ما جاش غلط بلاش استهبال ..

- نادر : خلاص انسي اللي قلته كله ونرجع اصحاب من تاني ممكن ..!!

- راندا : لالا صعب اوي .. بعد اذنك ورايا محاضرات ..

- نادر : اعمل ايه طيب علشان ما تزعليش ..!!

- راندا : انا بس مستغربه من اللي عملته ده .. حبتني ازاي .. !! .. انت تعرف ايه عني اصلا ً ...؟؟

- نادر : اي كان انا بردو بحبك من غير ما اعرف اي شىء .. !!

- راندا : ( يزداد غضبها ) .. انا غلطان اني وقفت كلمتك اصلا

( وتغادر راندا من امامه ... وتدخل المدرجات .. ويدخل هو ايضا .. ويختلس النظر اليها من تحت لتحت ... )

- هشام : ايه بقي يا عم كنت بتقولي هشرحلك .. في ايه بقي ..؟؟

- نادر : في حاجات كتير ... !! .. بس هقولك بعدين لحسن حاسس ان راسي مصدع اوي ومحتاج ارتاح شوية .. بس اكيد 

هحكيلك بعدين انا ليه غيرك ..

- هشام : ماشي يا روميو ..

( يدخل المنزل .. ) . .

- الام : هاا عملت ايه ..؟؟

- نادر : يحكي لها ما دار بينه وبين راندا ..!!

- الام : والله بنت محترمه وعاقله جدا ً برافوا عليها .. و تلاقيها غيرت رقمها كمان علشان انت كمان ما تكلمهاش ... !!

- نادر : انا حاسس انك فرحانه فيه ..!!

- الام : لالالا فرحانه بيها _ ان لسه فيه بنات محترمه كده _ هجيب لك الاكل واجي لحسن انا جعانة من بدري ومستنياك ..

- نادر : ماشي لحسن انا كمان ما كنتش فطرت لحد دلوقت .. !

( هنا يدق موبايل نادر .. ولكن يدق برساله .. فينظر اذ الرساله من راندا .. !!)

- نادر : ( محدثا نفسه ) افتحها ولا بلاش ... ياتري فيها ايه بس ... !!


******************************************************

الحلقه العاشره ...

- نادر : ( محدثا نفسه ) ياتري الرساله هتشتمني فيها ولا هتعتذرلي عن اللي عملته فيه ولا هتقولي امسح رقمي ... وبعد طول تفكير يفتح الرساله ويكون مكتوب فيه .. نادر انا هربت منك علشان خايفه اتعلق بيك وبعدين تسبيني .. بس خلاص مش هقدر ابعد عنك ... هنا لا يستطيع نادر ان يتكلم من السعاده فيسرع الي والدته ...

- نادر : ماما .. ماما

- الام : ايه .. ايه في ايه مالك ... خير ...؟؟

- نادر : راندا بعتتلي مسج دلوقت ..

- الام : وكتبتلك فيه ايه ..؟؟

- نادر : خدي شوفي انتي اهوة ... لحسن لو قولتلك مش هتصدقيني ..

- الام : ( تمسك الموبايل .. وتقرا الرساله ) .. معقول ..!!

- نادر : وبعدين يا ماما مش عارف اعمل ايه ..؟؟

- الام : علي اد ما انا فرحانه علي اد ما انا خايفه عليك ليكونوا اغنيه يا ابني وما يردوش بيك وفي الاخر تتصدم يا حبيبي ..

- نادر : ليه كده التشاؤم ده بس يا امي ..

- الام : يا حبيبي انا خايفه عليك خليك واقعي ..

- نادر : حاضر يا امي ..

( تليفون نادر يرن ... فيهرول الي الهاتف مسرعا .. يعتقد انها راندا ولكنه يجد هشام .. )

- نادر : الو يا هشام اخبارك ايه .؟

- هشام : تمام يا ابني واحشني ما تيجي تقعد معايا شوية النهارده ..

- نادر : انا كنت هجيلك من غير ما تقول جهز لينا بس الشطرنج علشان اجي اغلبك شوية ..

- هشام : يا عم كل شىء جاهز .. تعالي بس بسرعه علشان انا جعان وهستناك ناكل سوى ..

- نادر : لالا انا هاكل مع ماما وهاجي اشرب معاك الشاي والسحلب والنسكافيه ( ضاحكا )

- هشام : ( ضاحكا ) تشرب كل ده معايا يا مفتري _ لالا تعالي كل اسهل واشرب ده كله عندك

- نادر : انا مسافه السكه علشان احكيلك ع الموضوع اياه بكل تفاصيله .

- هشام : مستنيك يا اتش سلام ..

(يطريق نادر باب هشام .. فيفتح الباب والد هشام .. )

- نادر : اخبار حضرتك ايه يا عمي ..؟

- والد هشام : انا تمام يا ابني اتفضل .. يا هشام _ نادر جه يا ابني تعالي قابله ..

- هشام : اهلا اهلا .. تعالي نخش الاوضه علي طول

- نادر : ااقفل يا عم هشام الباب كويس وتعالي لما احكيلك بقي ..

- هشام : احكي يا شهريار ..

- نادر : ................. بس يا سيدي هي دي الحكايه من اولها لاخرها ..

- هشام : وهتعمل ايه دلوقت ..؟

- نادر : مش عارف _ بس انا هشوفها بكره أكيد في الجامعه وهتكلم معاها كتير نفسي اغمض عيني وافتحها الاقي بكره جه .. المهم انت ايه رايك في اللي حكيتهولك ده كله .. !!

- هشام : والله مش عارف .. بس مبدئيا لازم تشوف نظام اهلها ايه .. وهل هيوافقوا بيك ولا لاء ...؟؟

- نادر :(ضاحكا ) انا كده حاسس اني قاعد مع امي ههههههه

- هشام : ما هو ده كلام الناس العاقلين

( هنا يخبط باب الغرفه .. انها والدته هشام وقد احضرت الشاي . )

- والدت هشام : اتفضلوا الشاي يا اولاد ..

- نادر : تعبتي حضرتك ليه بس يا طنط ..

- والدت هشام : لالا يا بني .. تعب ايه بس _ ثم انت كل فين وفين علي ما بنشوفك

- هشام : تسلم ايدك يا ماما ..

( وتخرج الام وتغلق باب الغرفه ..)

- نادر : يااااه ده الوقت سرقنا خالص دي الساعه بقت 10.00 انا همشي ياعم علشان اعرف اصحي بكره بدري .. يلا تصبح علي خير اشوف بكره بقي ..

- هشام : طيب كمل الشاي طيب

- نادر : مره تانيه بقي _ يلا سلام ...

وياتي اليوم الموعود .. انها المره الاولي التي سوف يلتقي فيها نادر بحبيبته بعد ان صارحته بحبها .. فينتظرها امام الجامعه .. وتعلوا اصوات دقات قلبه ..

- هشام : صباح الفل يا نادر .

- نادر : صباح النور ... كويس انك جيت تقف معايا لحسن انا متوتر خالص ..

- هشام : هي جت ..؟؟

- نادر : مش عارف _ بس مشفتهاش لحد دلوقت ..

- هشام : ما تتصل بيها ياعم ..

- نادر : انت شايف كده ..؟؟

- هشام : ايوة طبعا ...

( فيمسك نادر موبايله .. ويبحث عن راندا .. راندا ... )

- هشام : خلاص يافالح هي جت هناك اهيه .. اسيبك انا بقي ..

- نادر :( متوترا ) رايح فين ... استني معايا

- هشام : مالك يا ابني .. امال فين الجراءه .. ايه يا عم روميو _ يلا خش بقلب جرىء كده امال ..

( يذهب نادر باتجاه راندا .. ثم يمد يده لها .. فتمد يدها اليه في خجل ويظل ماسك يدها بين يده ..)

- نادر : ازيك يا راندا ..

- راندا : الله يسلمك _ ازيك انت ..

( فتسحب يدها يهدوء من بين يديه )

- نادر : ينفع نتمشي شوية النهارده بعد المحاضرات ..؟؟

- راندا : ماشي .. بس مش هنروح بعيد عن شارع الجامعه

- نادر : اه طبعا ما تخافيش .. يلا نخش المحاضره ..

- راندا : يلا ..

( وبعد انتهاء المحاضرات .. يخرجوا سويا من باب الجامعه كل منهم لا يعرف كيف يبدأ الكلام .. )

- نادر : مبدئيا احب اعرفك بنفسي .. انا اسمي نادر حمدي .. عايش في منطقه شعبيه .. ماليش اي اخوات خالص لا اولاد ولا بنات .. والدي متوفي .. وامي هي كل حياتي ..

- راندا : ربنا يخليهالك

- نادر : ويخليكي .. احنا ناس علي قد حالنا مستوانا المادي متوسط ..

( هاتف راندا يرن ... )

- راندا : اسفه يا نادر .. لحظه .. الو يا ماما .. انا خلصت محضرات وقدام الجامعه ... لالالا مش لوحدي مع نادر .. حاضر مع السلامه ..

- نادر : ( مندهشا ) ايه ده هي والدتك تعرفني ..؟؟

- راندا : أكيد طبعا .. ماما تعرف كل شىء عني مش بخبي عنها حاجه ابدا ..

- نادر : وياتري قولتيلها ايه بقي عني ..؟

- راندا : لالالا دي اسرار بقي مش هقولك ..

- نادر : بقي كده يعني ماشي يا ستي .. بس خليكي فاكراها

- راندا : قولتلها انك حد محترم وشهم وجدع _ خلاص ياعم ..

- نادر : ياااااه انا الحاجات الحلوة دي كلها .. وعلي كده حماتي رايها ايه بقي ..؟؟

- راندا : ( تضحك ضحكه مع خجل ) . حماتك بسرعه كده ..

- نادر : ده اللي اتمناه ..

- راندا : بس انت ما تعرفش حاجه عني لسه خالص ..

- نادر : اي شىء انا راضي بيه _ بس يارب انتي اللي توافقي بيه .. انتي واهلك ..

- راندا : انا اهلي بيثقوا في عقلي واختياراتي كويس اوي .. وانا شيفاك انك ولد فعلا نادر .. يعني اسم علي مسمي .. بس انت ما تعرفش اي شىء عني بردو .. ما تاخدش قرار دلوقتي ترجع تندم عليه بعدين ..

- نادر : المهم بعد اللي عرفتيه عني تفتكري اهلك هيوفقوا بيه ..؟؟

- راندا : اعتقد بنسبه 80 % انهم مش هيقولو لاء علي واحد انا راضيه عنه اوي لانهم واثقين في اختياراتي _ يلا انا لازم امشي الوقت اتاخر اوي _ سلام

( يدخل نادر المنزل )

- نادر : ماما .. انا اتكلمت معاها وقالتلي ان اهلها موافقين كمان .. انا حاسس اني في غايه السعاده .. اخيرا هتجوز واحده غنيه وهيكون عندي عربيه وفيلا ..

- الام : حيلك حيلك .. ايه ده كله انت بتحلم ... انت فين كرامتك لما مراتك ابوها يشتريلك عربيه ..

- نادر : هو يشتريها لبنته وانا هبقي اركبها معاها ( ضاحكا ) وهي مش هتقول لاء .. لحسن راندا دي بتحبني موت ..


********************************************************

الحلقه الحاديه عشر ...

يدخل نادر غرفته ويغلق الباب .. ثم بجلس يفكر في راندا .. ثم تفتح الام باب الغرفه ..

- الام : نادر عندك هدوم عايزه تتغسل .. ؟؟ .. نادر .. !!

- نادر : هــا بتكلميني يا ماما ..؟

- الام : اللي واخده عقلك .. بقولك عندك هدوم عايزه تتغسل ..؟

- نادر : لا يا مااما شكرا

- الام : هتفضل سرحان بقي يا نادر في راندا وهنسيب مذكرتنا ودراستنا .. ؟؟

- نادر : يا ماما انا طول النهار كنت بذاكر ما جتش من نص ساعه بس هريح شوية وبعدين هقوم اذاكر .. !!

- الام : لا ما تسهرش تذاكر انت ناسي ان بكره وراك جامعه بدري .. نام احسن بدري علشان تصحي فايق .. يلا تصبح علي خير يا حبيبي ...

- نادر : وانتي من اهل الخير يا ماما

ويبدأ يوم جديد في حياه نادر .. يستيقظ من نومه ثم يرتدي ملابسه .. وينزل الي الجامعه .. وبينما يدخل من باب الجامعه الجامعه اذ به يسمع صوت ..

- راندا : بس بس .. !! _ نادر .. !!

- نادر : راندا .. انتي ايه بتنادي علي قطه ..

- راندا : ( ضاحكه ) اعملك ايه ما انت واخد في وشك وماااااشي

- نادر : ما انتي السبب ما بقتش اعرف اركز خالص في اي حاجه .. !!

- راندا : لا والله .. هاتها فيه انا بقي .. ثم يا نادر انت لسه ما تعرفش عني اي حاجه ..

- نادر : هو ده بالضبط اللي انا جاي الجامعه النهارده مخصوص علشان اكلمك فيه .. عايز اعرف كل حاجه عنك ..

- راندا : عايز تعرف ايه بالضبط ..؟؟

- نادر : كل حاجه عنك ..

- راندا : كده هنحتاج يوم كامل

- نادر : انا فاضيلك النهارده كله ..

- راندا : والمحاضرات ...؟؟

- نادر : هنجيبها من اي حد بعدين ... بس تيجي معايا نقعد في الحديقه بتاعه الجامعه وتحكيلي كل شىء بالتفصيل ...

فيمشي كل منهم باتجاه الحديقه .. ويذهب نادر ليشتري عصير من كافيتريا الجامعه ثم يجلس بجوار راندا ..

- نادر : اتفضلي يا ستي اشربي العصير .. واحكيلي بقي ..

- راندا : تعبت نفسك ليه بس .. علي العموم شكرا _ تحب نبدأ منين بقي ... !!

- نادر : من مكان ما تحبي ..

- راندا : انا بابا غلبان جدا وعلي قد حاله وشغال شغلانه بسيطه جدا ..

- نادر : شغال ايه يعني ..؟؟

- راندا : هقولك انت مستعجل ليه _ وليه اخ وحيد اسمه وليد .. هو 24 سنه وبس .. !

- نادر : ما قولتيش بابا شغال شغلانه بسيطه ازاي .. امال ايه العربيه اللي بتيجي تاخدك بسواق دي .. !!

- راندا : ده مش سواق .. ده وليد اخويا شغال سواق عليها وساعات بيجي يوصلني

هنا يحمر وجه نادر ... !! ويبدو عليه علامات التعجب ... !!

- نادر : بس ليه ما قولتيش كده من زمان ..!!

- راندا : ما جتش فرصه ..

- نادر : يا سلام .. ازاي ما جتش فرصه ؟؟

- راندا : انت اللي اتخدعت في المظاهر وبنيت صوره من خيالك وخلاص ثم انت لسه ما تعرفش الباقي .. انا بابا شغال بواب في عماره واحنا غلبانين فوق ما تتخيل _ علشان كده قولتلك ما تتسرعش بالحكم عليه .. وعلي العموم احنا لسه في اولها محدش خسر حاجه ...

- نادر : مش عارف ااقولك ايه _ بس انتي ازاي تستغلي اخوكي وتعمليه السواق بتاعك وليه كنتي محسساني انك غنيه اوي ..

- راندا : انا محسستكش بحاجه .. انت اللي اتخيلت ده .. مش ذنبي انا .. اني ما طلعتش زي ما انت عايز .. علي العموم انسي اللي بينا يا نادر وياريت تمسح رقمي خالص ... ولو شفتني خلاص كأنك ما تعرفنيش .. انا هعفيك من الحرج من انك تتقدم لبنت بواب .. !!

وتغادر راندا الحديقه .. ويجلس نادر في ذهوله متعجبا .. ثم يذهب للمنزل ...

- الام : مالك يا نادر شكلك متضايق ليه كده حد مزعلك ولا ايه ..؟؟

- نادر : هغير هدومي بس يا امي وهحكيلك علي كل شىء ..

- الام : خير يا نادر ..

- نادر : خير يا امي _ ما تخافيش ..

ثم يرن هاتف نادر ..

- نادر : الو يا هشام انت فين يا ابني انا مستنك في البيت اهوه ..

- هشام : انا في الطريق 5 دقايق وهبقي عندك .. سلام

- الام : هو هشام مكنش معاك النهارده في الجامعه ولا ايه ..؟؟

- نادر : لا ما رحش .. وانا اتصلت بيه وانا جاي قولت يجي اخد رايه في موضوع كده

- الام : موضوع ايه بقي _ ولا ده سر ؟؟

- نادر : لا سر ولا حاجه بس هشام زي اخويه وعايز اخد رايه ورايك في حاجه بخصوص راندا ..

- الام : وماله يا ابني .. هشام محترم وعاقل .. بس ايه اللي حصل ..؟؟

- نادر : مستعجله علي رزقك ليه بس يا ام نادر .. هغير هدومي قبل ما يجي هشام وهحكي لكم علي كل شىء ...

يدق جرس الباب ..

- نادر : ايووووة جاي يا اتش ..

- هشام : مساء الخير يا نادر ..

- نادر : مساء الفل .. اتفضل يا هشام ادخل

- الام : اهلا اهلا .. ازيك يا هشام ..

- نادر : يلا يا ماما جهزي الاكل بقي لحسن جعنا عايزاه يقول علينا ايه الاستاذ هشام ...؟؟ بخلاء ... ولا ايه

- هشام : لالالا انت اللي بخيل _ بس انا بجد شبعان مش هقدر ااكل

تدخل الام المطبخ لتحضر الطعام .. فيهمس هشام بصوت خافت في اذن نادر ..

- هشام : ايه يا عم كنت بتقولي عايزك في حاجه مهمه .. ايه هي بقي ..؟؟

- نادر : يا اخي اصبر هقولك كل حاجه .. بس ناكل الاول ..

- الام : الاكل ياولاد يلا ...

- هشام : اكل حضرتك جميل اوي .. ربنا يكرمني واتجوز وحده تكون بتعرف تطبخ زي حضرتك انتي وماما .. لحسن البنات الايام دي تحسيها مش بتعرف تعمل حاجه خالص ..

- الام : ( ضاحكه ) وانت يا نادر .. عايزة ايه ...؟؟ ولا انت يا نادر مراتك هيبقي عندها طباخ ..؟؟

يقع الاكل من فمه من كثره الضحك .. ويدخل في نوبه ضحك شديده _ فيضحك الجميع لضحكه ..

- الام : ياسلام عاجبتك اوي كده ...

- نادر : لالالا .. بس اصلكم مش عارفين الي فيها ..

- هشام : يا ابني هو في ايه ... في حاجه بخصوص راندا صح ..؟؟

- نادر : الصراحه .. راندا طلعت بنت فقيره جدا ً ..

- هشام : لالا مستحيل .. انت بتهزر ..

- الام : ازاي يعني ..

- نادر : والله العظيم زي ما بقولكم كده _ هي صرحتني بكل حاجه النهارده .. قالتلي ان ابوها شغال بواب ..

- الام : ( في ذهول ) بواااااب .. !!

- هشام : مستحيل ياعم انا بقولك مستحيل ... شكلها مش كده خالص ..!!

- نادر : يعني هي هتكدب عليه ليه بس ..

- هشام : طيب والعربيه دي كانت ماجراها مثلا بسواقها ...؟؟

- نادر : لا يا سيدي ده يبقي وليد اخوها .. شغال سواق علي العربيه دي ..

- الام : وبعدين .. انت قولتلها ايه ..؟؟

- نادر : معرفتش ارد بصراحه ولا اتكلم .. هي قالت الكلمتين دول وسابتني ومشيت وقالتلي هعفيك من اي حرج .. وانسي اللي بينا _ وامسح رقمي ..

- هشام : وانت ناوي تعمل ايه ...؟؟

- نادر : ما انا جايبك وبحكي لك انت وماما علشان تقوليلي رايكم ..!!

- الام : انا شايفه اذا هي محترمه وعندها اخلاق زي ما انت كنت بتحكي عنها .. يبقي ايه المشكله .. احنا كمان مش بوابين .. بس مش اغنياء اوي .. !!

- هشام : بس شغلانه البواب دي .. وحشه اوي وهتكسفك بعدين ..!!

- الام : هي شغلانه شريفه .. ما تعرفش ظروفهم ايه .. انا عندي ابوها بواب ومحترم وملتزم ومربي بنته .. احسن من صاحب شركه او مصنع ويكون حرامي ومعندهوش ضمير وبنته مش متربيه ..

- هشام : انا شايف انك تشوف حد غيرها يا نادر .. !! البنات كتير

- نادر : والله مش عارف ااقول ايه .. ولا اعمل ايه .. !!

- الام : انت اللي لازم تقرر وتختار دي حياتك .. احنا يا دوب ننصحك .. وانت اللي تقرر

- نادر : بس القرار صعب شوية .. انا شايف انها شخصيه عاقله جدا .. واخلاق علي اعلي مستوي .. ولا انت مش معايا يا هشام .. !!

- هشام : ايوة معاك .. بس بردو _ بواب دي في مجتمعنا وحشه اوي ..

- الام : احنا لو هنعمل كل حاجه في حياتنا علشان نرضي الناس محدش هيرضي من الناس يا هشام يا ابني _ هيطلعوا في كل حاجه عيب ويحكوا فيه .. يبقي المفروض نعمل الصح .. يعني ولاد البوابين ما يتجوزوش غير من بعض وبعد كده نعملهم بلد يعيشوا فيها ونعزلهم .. هما وعمال النظافه .. وبعد كده اللي بشرته لونها اسود نعمل تفرقه عنصريه وبعد كده الاغنياء بس يتجوزوا من بعض .. هتلاي الدنيا بااااظت .. الاسلام لما جه ما خلاش في فرق بين ابيض او اسود .. او غني او فقير .. المهم مين بيتقي ربنا ..

- هشام : والله كلام حضرتك صح .. ايه ياعم نادر ما تتكلم .. !!

- نادر : ااقول ايه .. !! سبوني افكر بعدين هبقي اقرر اعمل ايه .. !!

- هشام : طيب انا همشي بقي .. وشكرا علي الاكل الجميل ده .. تسلم ايد حضرتك بجد ..!!

- نادر : معلش بتعبك معايا بس انت اخويا بقي .. !!

- هشام : عيب عليك .. احنا اخوات

فيغادر هشام المنزل .. ويدخل نادر غرفته .. ويفكر في كلام هشام .. وكلام والدته

وينظر الي سقف غرفته .. حتي يخلد الي النوم ...

وبعد مرور عده ايام ...

يذهب للجامعه ويدخل المدرج .. فيقترب منه هشام ..

- هشام : حمد الله علي السلامه يا عم بقالك كام يوم مش بتيجي

- نادر : الله يسلمك .. مكنش ليه نفس اجي والله .. مكنتش عايزها تشوفني .. !!

- هشام : هي اصلا مش بتيجي .. !!

- نادر : معقووول .. !!

- هشام : اه والله .. ما جتش ولا يوم من الايام اللي فاتت .. !!

- نادر : تفتكر لو شافتني هتعمل ايه ..؟؟

- هشام : اكيد هتعمل مش شيفاك .. لانك عرفت حقيقتها ومكسوفه منك طبعا ..

- نادر : انت يا ابني مالك قاسي عليها ليه كده .. هي بنت بواب بس حساسه جدا ..!!

- هشام : انت حنيت ولا ايه .. انت لسه عايزاها بجد ...؟؟

- نادر : الصراحه انا فكرت واخدت قرار .. !!

- هشام : وايـــــــــــــــــــــــــه هو القرار بقي ...؟؟

- نادر : هتعرفه بس مش دلوقت .. انا عايز بس دلوقت اعرف هي ما جتش ليه .. !!

- هشام : اتصل بيها ..

- نادر : نعــــــــــــــــــــم .. !! _ افرض احرجتني وقالتلي عايز ايه .. وممكن تقولي مش قولتلك امسح الرقم .. !!

- هشام : لا يا اخي مش ممكن .. ده هي اللي مكسوفه منك ..

- نادر : بص انا هتصل واللي يحصل يحصل ...

يطلع هاتفه ويتصل ..

- نادر : قولتلك اهوه جرس وماردتش .. انا غلطان اني سمعت كلامك من الاول _ يارتني ما اتصلت .. انا فعلا ... وهنا ( يقاطع صوت نادر .. صوت هاتفه يرن ) .. فينظر فيجد رقم راندا ... !!

- هشام : هي اللي بتتصل ولا ايه ...؟

- نادر : ( ويبدو عليه الحرج ) .. اه

- هشام : طيب رد بسرعه يا فالح .. علشان تعرف اني صح دايما ..

- نادر : الوو

- راندا : معلش يا نادر كنت راكبه العربيه ما عرفتش ارد عليك ..

- نادر : لالا ولا يهمك .. انا بس كنت عايز اطمن عليكي .. مش بتيجي الجامعه ليه ..؟

- راندا : ابدا .. بس كنت تعبانه شوية الايام اللي فاتت ..

- نادر : ( ويبدو عليه الانزعاج ) .. تعبانه عندك ايه يعني ..ورحتي للدكتور ولا .. لاء _ طمنيني عليكي ..

- راندا : لالا ما تخافش انا بقيت كويسه جدا الحمد لله _ ثم انا خلاص نص ساعه وهبقي في الجامعه ..

- نادر : بجد طيب انا في انتظارك .. سلام

- راندا : سلام ..

- هشام : ايه ياخويا .. خايف عليها اوي كده ليه .. كده انا عرفت القرار .. خلاص هتكمل معاها ثم ممكن ربنا يكرم ابوها بعدين ويبقي زي احمد ذكي في فيلم البيه البواب .. ويبقي غني وانت مناسب البيه البواب ..

- نادر : ( يتلون وجه نادر ) .. انا حكيتلك كل ده علشان اعتبرتك اخويا .. بس لو هتكلم بالاسلوب ده ... يبقي انا غلطان اني حكيتلك .. ومااحبش اشوفك بتحكي كده عن ابوها ولا عن اي حد فقير .. الشغل مش عيب ولا حرام ..

- هشام : انا اسف والله ما اقصد _ ما تزعلش بس بهزر معاك يا عم مش كده .. المهم هي اتكلمت معاك ازاي .. !!

- نادر : ( وقد عاد الي طبيعته ) .. ولا كأن في اي حاجه .. عااادي جدا ً

- هشام : علشان كده ساكت .. لكن لو كانت كلمتك وحش .. كنت فضحتني قولتيلي انت السبب تاني صح .. !!

- نادر : ( ضاحكا ) يعني اطلع غيظي فين غير في هششش حبيبي .. !!

- هشام : ماشي ياعم اضحك عليه بكلمتين _ المهم هتعمل ايه معها دلوقت .. !!

- نادر : مش عارف والله .. سايبها للظروف ..

وتدخل فتاه المدرج .. فترفع نظارتها الشمسيه وتنظر .. انها هي راندا .. فتتعالي ااصوات دقات قلب نادر .. فهو لا يعلم ماذا يفعل ..!! _ فيرفع يده في اشاره لها .. ومضي كل منهما نحو الاخر ..

- نادر : طمنيني عليكي في ايه .. !!

- راندا : ابدا مفيش .. كان شوية برد بس بقيت احسن الحمد لله ..

- نادر : الف سلامه _ راندا من غير مقدمات .. انا عايز ارتبط بيكي حتي لو كنتي بنت بواب ..

- راندا : وتفتكر والدتك هتوافق .. ؟؟

- نادر : انا معرفها كل حاجه وهي موافقه وقالت اهم شىء الاخلاق والادب .. علشان كده عايز ااقابل حد من عندك ولو حتي هجيبلك دبله وتبقي خطيبتي ونكمل الاربع سنين مع بعض بعدها نتجوز مباشره ... !! ايه رايك ... ؟؟

- راندا : مش بالسرعه دي _ ثم بابا بواب اه .. بس بردو من حقه يقرر .. يوافق ولا لاء .. !! انا طبعا كل حاجه بحكي لماما عليها .. وهشوفهم وهرد عليك بعد بكره لما نتقابل في الجامعه .. !!

- نادر : لا عرفيهم .. واتصلي بيه النهارده .. !!

- راندا : انت سريع اوووي ليه كده .. الحجات دي مش عايزة استعجال .. ثم انت ليه متمسك كده بيه .. انا قولت انت خلاص .. هتنساني ..

- نادر : لالا انا بس كنت مستغرب يعني في يوم وليله ... لاقيت كل حاجه اتغيرت .. بس ده كله مش مهم ..

- راندا : بس لحسن الدكتور دخل .. لحسن يطردنا ... بعدين نكمل ..


******************************************

الحلقه الثانيه عشر ... ( الاخيره )


ويعود نادر الي والدته ويحكي لها ما دار بينه وبين راندا ..

- نادر : ولا انتي رايك ايه يا ماما ..؟

- الام : بس ليه ارتباط دلوقتي كنت استنيت تخلص 2 حتي ..!!

- نادر : يا ماما خلاص السنه دي هتفرق اوي .. كلها شهرين بالضبط واخلص اولي .. ثم انا عايز استقر عاطفيا علشان ااقدر اركز في دراستي .. مش كده بردو ولا ايه .. !!

- الام : انا خايفه تشغلك ..

- نادر : بالعكس يا امي .. طول ما الواحد جعان مش بيعرف يذاكر لان عقله في الاكل .. دي كمان نفس الحكايه .. اذا انا عرفت خطيبتي مين وهرتبط بمين بعدين يبقي هشغل باللي بايه بس .. !! _ كلامي صح ولا غلط .. !!

- الام : ماشي يا نادر _ اما نشوف هترد عليك تقولك ايه ... !!

- نادر : انا هتصل بيها دلوقت ..

- الام : سيبها براحتها شوية .. مش كده ..

فيدخل نادر غرفتيه .. ويغلق الباب .. ويتصل براندا

- نادر : الوو يا راندا

- راندا : الو

- نادر : عملتي ايه .. !!

- راندا : ( ضاحكه ) انا لحقت اعمل حاجه ... !

- نادر : يعني لسه ما قولتيش ليهم .. بقي كده .. !!

- راندا : لا انا قولت لماما .. بس بابا لسه _ علي فكره ماما عايزه تكلمك .. !!

- نادر : تكلم مين ..؟؟ انا .. !!

- راندا : اااااه _ هو في غيرك .. !!

- نادر : ( يتحدث بتوتر وخجل ) ماشي خليني اكلمها ..

- والدت راندا : ازيك يا نادر ..

- نادر : انا الحمد لله بخير واخبار حضرتك ايه ..

- والدت راندا : انا تمام يا ابني .. راندا بتشكر كتير فيك ومن زمان كنت حابه اتعرف عليك

- نادر : ده شرف ليه والله .. !!

- والدت راندا : ربنا يخليك يا ابني انت في معزه وليد ابني تمام .. وشكل راندا عندها حق انت شكلك انسان محترم اوي ..

- نادر : ربنا يخليكي يا ست الكل

- والدت راندا : راندا معاك اهيه

- راندا : يلا ياعم اديك كلمت ماما اهوه عايز ايه تاني بقي ..؟؟

- نادر : ده انا كنت مكسوف منها جدا .. مكنتش عارف اتكلم .. ربنا يخليها

- راندا : ربنا يخليك .. يلا انا هقفل بقي .. وما تقلقش لما بابا يجي النهارده ماما هتفتحه في الموضوع .. علي فكره هو عنده خلفيه كبيره عنك بردو .. !!

- نادر : يا مسهل يارب .. يلا سلام

- راندا : سلام

يخرج نادر من غرفته .. وينادي ..

- نادر : ماما .. ماما .. !!

- الام : خير يا نادر مالك .. !!

- نادر : انا كلمت ام راندا دلوقتي .. !!

- الام : بجد .. !!

- نادر : والله هي اللي كلمتني .. وست شكلها طيبه اوي .. !!

- الام : طيب الحمد لله .. انا كمان عايزه ابقي اكلم راندا بقي ... !! اشمعني انت تكلم امها .. !!

- نادر : بس كده يا ست الكل .. ادي رقم راندا .. !!

- راندا : الو .. ايه يا نادر والله لسه بابا ما جاش علشان ااقوله ( ضاحكه ) ..!

- نادر : ( ضاحكا هو الاخر ) .. لالا بس ماما قالت اشمعني انا .. وعايزه تكملك .. !!

- راندا : بجد .. طيب خليني اكلمها .. !

- الام : ازيك يا حبيبتي ..

- راندا : ربنا يخليكي يا طنط .. اخبار حضرتك انتي ايه .. والله نفسي اشوف حضرتك

- الام : ربنا يخليكي يا حبيبيتي .. هتشوفيني قريب ان شاء الله ..

- راندا : ( تضحك ضحكه خجل ) ان شاء الله يا طنط .. مش عايزة حاجه حضرتك .. ؟

- الام : عايزة سلمتك يا راندا وخدي بالك من نفسك ومذكرتك يا بنتي ..

- راندا : من عنيه حاضر .. وانتي كمان خدي بالك من نفسك ومن نادر .. مع السلامه

تغلق الام الهاتف .. ويبدوا عليها علامات الرضا والسعاده من هذه المكالمه .. !!

- نادر : خلاص يا ستي كلمتي بنتها انتي كمان زي ما هي كلمت ابنك ( ضاحكا )

- الام : بس شكلها بنت رقيقه يا نادر خالص

- نادر : انت لسه شفتيها .. امال لما تشوفيها بقي .. وكمان ايه دي حافظه نص القران

- الام : ما شاء الله عليها .. ربنا يجعلها من نصيبك .. وما تسمعش كلام هشام .. هشام كويس وكل حاجه .. ولكنه متاثر بالناس اللي حواليه وده غلط .. واللي فيه الخير يقدمه ربنا

يقترب نادر من امه .. وياخذها في حضنه ...

- نادر : والله انا محظوظ ان انتي امي .. !! انا في الاول مكنتش عارف اخد قرار .. لو وحده غيرك وكانت قالتلي زي هشام .. وقالت مش هجوز ابني لبنت بواب وكده .. كنت هشيل الفكره من راسي خالص .. بس انتي ما فيش زيك .. يمكن هشام معزور انه مش عنده ام زيك كده تفهمه الغلط من الصح .. لو كل الامات زيك كده .. كانت حاجات كتير اتغيرت ..

فتسقط دمعه من عيون ام نادر علي نادر .. فينظر الي امه ..

- نادر : انت بتعيطي ليه يا ماما بس .. !! مش عايز اشوف دموعك دي خالص

- الام : بس حاسه اني طايره من الفرح .. اني ابني فخور بيه .. ربنا يخليك ليه يا حبيبي .. مش متخيله الايام جريت ازاي .. وافتكرت ابوك الله يرحمه .. كان حنين عليه اوي زيك كده .. وكان شبهك يا نادر .. لما كانت تحصل اي مشكله بينا واعيط كان يمسح دموعي بايده ويقولي حقك عليه ..

فينظر نادر الي صوره والده المعلقه .. وتبدا الدموع تتساقط من عينيه هو الاخر ..

- نادر : كان نفسي يا امي يكون بابا معايا وانا رايح اتقدم للعروسه ..

- الام : نصيبنا يا حبيبي .. هو كان بيحلم باليوم ده .. يوم ما خلفتك يا نادر بابا ما نمش يومها فضل شايلك لحد الصبح وكل ما تعيط يقوم يجري عليك ..

- نادر : يارتني ما كنت اتولد .. علشان ما كنتش اسببله اي تعب كده ولا اخليه يشيلني ده كله .. ياريته يرجع وانا اللي اشيله علي راسي .. انا بستغرب من اي شاب بيعامل ابوه وحش .. بقوله انت مش عارف قيمه ابوك ..

- الام : خلاااااص يا نادر بقي كفايا حرام عليك .. !!

- نادر : بس ربنا اخد ابويا وعوضني بحنانك يا ست الكل .. !!

- الام : لو انا مش هبقي حنينه عليك مين هيكون حنين ..!! هو انت ليك غيري .. ربنا عالم بينا .. !!

ويخيم الصمت انحاء الغرفه للحظات .. ثم يرن هاتف نادر .. فيمسح دموعه ويهرول الي الهاتف .. !!

- الام : تلاقيه هشام ..

- نادر : لا يا ماما ده رقم غريب .. الوو

- والد راندا : ازيك يا نادر .. !!

- نادر : ( بدهشه ) الله يسلمك .. مين حضرتك .. !!

- والد راندا : انا ابو راندا زميلتك في الجامعه يا نادر .. !!

- نادر : ( يتغير لون وجهه ) اهلا وسهلا يا عمي ..

- والد راندا : مش هكتر عليك يا ابني .. بس راندا قالتلي انك عايز تقابلني انت والست والدتك .. فـ لو مناسب ليكم يوم الخميس اللي جاي ... !!

- نادر : خلاص ان شاء الله يا عمي ..

- والد راندا : خلاص شاور برضوا الست والدتك .. وانا مستني منك تليفون .. تاكد عليه .. والبيت هتبقي تديكي راندا العنوان وتوصفلك البيت .. !!

- نادر : خلاص ماشي يا عمي ..

- والد راندا : تنورنا يا ابني .. !! .. وابقي سلم علي الست والدتك ..

- نادر : الله يسلمك يا عمي .. مع السلامه .. !!

- الام : ايه يا ابني اتفقت علي ايه .. فهمني .. !!

- نادر : هنروحلهم يوم الخميس اللي جاي .. !!

- الام : بعد بكره .. !! _ انا لسه عايزة اشتري عبايه حلوة تليق بالزياره ... كنت قولتله خليها الخميس اللي بعده ..

- نادر : لالالالالا يا ماما اشتري اللي عايزاه بكره .. عندي بكره اليوم بحاله .. ثم انا اروح ببدله واعمل عريس ولا البس جينز ولا ايه ... !!

- الام : لا يا ابني د مش فرح .. ده لسه تعارف ..انت عندك بنطلون اسود وقيمص اسود كده روح بيهم بتبقي زي القمر فيهم ..!!

- نادر : طيب تمام حتي راندا ما شفتنيش بيهم قبل كده لسه ..!! طيب انا هروح اشتري جزمه دلوقت عايزة حاجه اجيبهالك معايا من تحت ..؟؟

- الام : لالا شكرا ربنا يخليك ...

ويأتي صباح يوم الاربعاء ..

- نادر : ماما انا هتصل بيها دلوقت ااقولها اننا رايحين بكره .. واخد منها العنوان .. !!

- الام : يا ابني الساعه 10 استني ليكونوا لسه نايمين .. !!

- نادر : يا ماما راندا بتصحي 8 الصبح انا عارف .. !!

- الام : يا ابني البنت هتزهق منك كده .. ده انت مش ممكن .....!!!

- نادر : لا يا ماما ده علي قلبها زي العسل .. ( ضاحكا ) .. !!

ثم يرن هاتف نادر ..

- نادر : شفتي يا ماما راندا بتتصل اهيه .. !! الو يا راندا كنت لسه هكلمك حالا ً

- راندا : ( ضاحكه ) يلا بقي اديني وفرتك عليك الرصيد ..

- نادر : كنت لسه هتصل .. وماما عماله تقولي بلاش تزعجها سيبها تلاقيها نايمه .. !!

- راندا : لا انا لسه صاحيه حالا .. وبابا كان قالي اديك العنوان فقلت اتصل ايدهولك ..

- نادر : ثواني اجيب ورقه وقلم ... معاك يا ستي قولي يلا ..

- راندا25 شارع النرجس .. متفرع من شارع الزهور جنب كوافير سوزي .. المعادي

- نادر : انا هتصل بيكي .. تقابلينا .. بكره علي الساعه 4 كده العصر ماشي .. !!

- راندا : خلاص اوكي ...

ويأتي اليوم المرتقب .. انه يوم الخميس .. !! يتهىء نادر ويلبس قميص اسود مع بنطون اسود .. وتطاير منه رائحه العطر في كل اتجاه ويمسك بيده اليسرى علبه الشوكولاته .. ويمسك بيده اليمني والدته .. ويبدوا عليه الاناقه ..



- نادر : الو ياراندا .. انا عند الكوافير اهوة .. !!

- راندا : انا شيفاك من البلكونه .. بص فوق انا اللي بشاورلك فوق ..

- نادر : اه اه .. شفتك .. !!

- راندا : ثواني هبقي قدامك .. !!

- الام : ( يبدوا عليها الاستغراب ) هما في انهي دور ..!!

فجاءه يبص نادر يلاقي راندا ادامه .. وهي المره الاولي التي يري فيها راندا ترتدي لبس بيت .. فيطيل النظر اليها .. وهي تنظر له بخجل ..

- راندا : اهلا يا طنط .. اتفضلي ..

- نادر : وانا مافيش اهلا .. !! ولا انا مش لازم .. !!

- راندا : ازاي بقي .. اهلا وسهلا يا نادر ( ثم تهمس في اذنه ) ايه الشياكه دي يا عم ..!!

- نادر : ( يبتسم ابتسامه بخجل ) شكرا من ذوقك ...

- راندا : اتفضلوا يا جماعه .. اركبوا الاسانسير ..

ثم يصعدوا الي الشقه فيجدوا الباب مفتوحا وفي استقابلهم ام راندا .. ولكن مظهر العماره ابهرهم .. ووالدت راندا ليست كزوجه البوابين مما ادهش نادر والدته .. وبعد الترحيب المتبادل من الاسرتين دخل نادر ووالدته الشقه .. وقد ابهرهم الاساس الغالي .. هنا ايقن نادر ان هناك شىء ما خطأ .. وهو ما يحاول تفسيره .. !! وجلس الاسرتين .. بعد ان تم تقديم العصير للضيوف واثناء شرب العصير دخل والد راندا ..

- والد راندا : اهلا وسهلا .. نورتونا ..

- نادر : نورك يا عمي .. !!

- الام : ( بدهشه ..) .. حضرتك والد راندا .. !!

- والد راندا : اه ...

فظل ينظر نادر ووالدته كل منهما للاخر في استغراب ودهشه .. !!

- والد راندا : ليه مستغربين .. ؟؟

- نادر : هي راندا ما قلتش لحضرتك .. هي قالتلي انك بتشتغل ايه .. !!

- والد راندا : ( ضاحكا ) لا قالتلي يا سيدي .. !!

- نادر : يعني حضرتك عارف انها قالتلي .. ان حضرتك انا اسف يعني بواب .. !!

- والد راندا : اه عارف .. بس هي كان لازم تختبرك وتشوفك طمعان في فلوسها .. ولا بتحبها هي .. !!

- نادر : بس مكنش ينفع تخدعني يا عمي .. !!

- راندا : انا ما خدعتكش يا نادر .. بس كان لازم اختبرك ..

- والدت راندا : ما تزعلش يا نادر .. بس الصراحه انا اللي قولتلها تعمل كده .. وهي كانت واثقه فيك ومكنتش راضيه تعمل كده الا لما انا اصريت .. وده خلاك زدت في نظرنا اوي ..!!

هنا بدا نادر يلتقط انفاسه ..

- والدته نادر : الصراحه انا كنت جايه ااطلب ايد بنتكم لابني .. بس من اللي شفته ده شايفه اننا مش مناسبين ليكم .. احنا مستوانا ااقل كتير .. !!

- والد راندا : بس انتم كنتم راضيين تناسبونا واحنا بوابين .. يعني انتم تكونوا اكرم منا .. والله ده نادر ابني قبل كل شىء ..

- والده نادر : في الاول نادر كان معرفني انها مستوي عالي بس مكنتش اعرف انه للدرجه دي .. علشان كده لازم تعرف انه مش هيقدر يعيش بنتك في نفس المستوي ...

- راندا : انا عارفه يا طنط .. وانا هقبل ده .. !!

هنا يدق جرس الباب .. فتهرول راندا لتفتح الباب ..

- راندا : ادخل يا وليد ...!!

- وليد : معلش يا جماعه اتاخرت عليكم انا اسف .. ازيك يا نادر من زمان وانا عايز اشوفك

- نادر : ربنا يخليك يا استاذ وليد

وترجع المناقشه مره اخري .. بعد ان رحب وليد بنادر ووالدته ..

- الاب : علي فكره وليد ابني محاسب في بنك .. مش سواق ولا حاجه ( فيضحك الجميع )

- وليد : اه شفت ياعم نادر الاخوات بتعمل ايه مع بعض ( ضاحكا ) .. بس ليه سوواق يا راندا بقي .؟؟

- راندا : انا عارفه بقي اهوة اللي جه في باللي ( ضاحكه )

- ام نادر : يعني ااقدر اتجرىْ واطلب ايد بنتك لابني .. نادر ..؟

- الاب : رايك ايه يا عروسه ..

- راندا : ( بخجل ) .. بابا .. !! ( فيضحك الجميع )

- وليد : علي بركه الله نقري الفاتحه .. احنا بنشتري راجل

- الاب : نادر انا مستشار .. وعندي مكتب محماه .. ياريت من بكره تنزل معايا تدريب فيه انا مش هلاقي حد زيك اثق فيه .. انت بردو زي ابني ونعمل خطوبه رسمي بس الجواز بعد الجامعه .. ممكن نعمل شبكه كمان سنه ولا حاجه .. والشبكه اللي هتجيبها انا هدفع نصها وانت النص .. بس انت شد حيلك وحوش .. ان شاء الله هيكون ليك مرتب كويس في المكتب لحد ما ربنا يكرمك وتتخرج وتبقي محامي انت وهي .. !!

- نادر : والله مش عارف ااقولك ايه يا عمي .. علي تساهلك معايا للدرجه دي .. !!

- الاب : انت ابن حلال وراجل تستاهل بنتي .. اديهالك وانا مغمض ..

- والدت راندا : سمعونا الفتحه بقي يلا ......... ولا الضالين ........!!



ويعم الفرح المكان .. وها هو القدر الذي حرم نادر من والده .. عوضه بــ اسره جديد

وحينها ادركت ام نادر كرم الله معها حيث من عليها بزوجه لابنها تجمع بين المال والجمال والادب والاخلاق والنسب مما يجعل اي ام تتمناها زوجه لابنها ..



.. تمت القصه



انتظروا القصه الجديده .. دموعي لم تجف

تحياتي / اسلام سامي